Дзяніса Заянчэўскага і Максіма Таццянку асудзілі да 3 гадоў «хіміі» за інсталяцыю ў выглядзе пудзілаў з фотаздымкамі Наталлі Качанавай, міністра ўнутраных спраў Івана Кубракова і амапаўца ў балаклаве на фоне бел-чырвона-белага сцяга, паведамляюць праваабаронцы.
Справу разглядаў суддзя Аляксандр Рудэнка.
Суддзя адхіліў хадайніцтва аб правядзенні мастацкай экспертызы адносна таго, ці з'яўляецца інсталяцыя абразлівай. Таксама было адхіленае хадайніцтва аб запрашэнні Качанавай і Кубракова ў якасці сведак для высвятлення, наколькі абразлівая для іх дадзеная інсталяцыя. Хадайніцтва аб далучэнні да справы характарыстык абвінавачаных з месца працы, ад суседак, з юдэйскай абшчыны (у Таццянкі) задаволілі.
Падчас спрэчак пракурор запытаў для кожнага з абвінавачаных па тры гады абмежавання волі з накіраваннем у выпраўленчую ўстанову адкрытага тыпу.
26 лютага суддзя Аляксандр Рудэнка абвясціў менавіта такі прысуд, як і запытваў пракурор. Дзяніса Заянчэўскага і Максіма Таццянку вызвалілі ў зале суда.
Каментары