Дырэктарам Нацыянальнага гістарычнага музея Беларусі прызначаны Аляксандр Храмой. Пра гэта паведамляе «Звязда» са спасылкай на Міністэрства культуры.
Міністр культуры Анатоль Маркевіч адзначыў, што на чале музея сёння павінен быць чалавек, які з’яўляецца аўтарытэтным кіраўніком, мае прынцыповы пункт гледжання, умее аргументавана адстойваць сваю пазіцыю, аналізуе дзень сённяшні і выразна бачыць перспектывы дня заўтрашняга. «Гэтыя якасці арганічна спалучаюцца ў Аляксандры Храмым, які 6 гадоў працаваў у музеі на пасадзе намесніка дырэктара і ведае ўсе тонкасці музейнай і гаспадарчай дзейнасці», — падкрэсліў ён.
Аляксандр Храмой нарадзіўся ў 1976 годзе, скончыў Беларускі дзяржаўны педагагічны ўніверсітэт па спецыяльнасці «гісторыя і сацыяльна-палітычныя дысцыпліны», аспірантуру па спецыяльнасці «айчынная гісторыя», а у 2018 годзе атрымаў дыплом Акадэміі кіравання пры прэзідэнце Беларусі па спецыяльнасці «інавацыйны менеджмент».
Працаваў у Нацыянальным гісторыка-культурным музеі-запаведніку «Нясвіж» вучоным сакратаром з 2011 па 2013 год, у 2013-2019 гадах быў загадчыкам экспазіцыйна-выставачнага аддзела, намеснікам дырэктара Нацыянальнага гістарычнага музея. З 2019 года быў дырэктарам Дзяржаўнага літаратурна-мемарыяльнага музея Якуба Коласа.
Каментары