26 красавіка быў затрыманы Дзяніс Краўчук.
Пра гэта «Нашай Ніве» расказала мама Дзяніса Надзея Міхайлаўна. Затрыманне адбылося ўвечары 26 красавіка. Прыкладна а 18-й гадзіне ў кватэру Краўчукоў прыйшлі больш за дзесяць супрацоўнікаў КДБ.
Дзянісу адразу надзелі на рукі кайданкі, паказалі пастанову аб ператрусе, у якой чамусьці не быў пазначаны крымінальны артыкул, па якім адбываецца дзеянне. Краўчука хутка забралі, дазволіўшы ўзяць з сабой ручнік і зубную пасту. Ператрус праводзілі ў прысутнасці сваякоў. Забралі некалькі старых тэлефонаў, а таксама CD-дыскі з запісамі вяселляў і пахаванняў. Таксама ператрус правялі ў гаражы, падвале і машыне.
«Позна ўвечары патэлефанаваў следчы, які сказаў, што на наступны дзень патрэбны адвакат, іначай будзе дзяжурны», — расказвае мама Дзяніса.
Цяпер Дзяніс праходзіць у якасці абвінавачанага па артыкуле 357 КК «Змова ці іншыя дзеянні, здзейсненыя з мэтай захопу дзяржаўнай улады». Тэрмін знаходжання пад вартай працягнуты да 2 месяцаў.
Як Краўчук звязаны з Зянковічам? Перад прэзідэнцкімі выбарамі-2020 Дзяніса затрымалі як назіральніка і асудзілі да 10 сутак арышту. Атрымалася так, што ён адбываў пакаранне ў адной камеры з Юрасём Зянковічам, якога затрымалі за акцыю пратэсту ў Мядзелі 9 жніўня.
«Шчыльна яны не стасаваліся», — пераконвае мама.
Па адной з версій, Краўчук даглядаў дом Зянковіча на Мядзельшчыне, пакуль гаспадар жыў у ЗША.
26 кастрычніка Краўчук уладкаваўся на працу ў Літву дальнабойшчыкам, у лістападзе з’ехаў туды.
«Ён рыхтаваўся да працы, таму ўжо ні ў якіх маршах і дэманстрацыях не ўдзельнічаў. 8 красавіка ён прыехаў у Беларусь, каб працягнуць візу. Калі ён такі небяспечны злачынца, то чаму яго не затрымалі адразу пры перасячэнні мяжы? Усе ў нас у Нарачы ведаюць, што Дзяніс вельмі годны і адказны чалавек, нічога кепскага не зробіць», — кажа Надзея Міхайлаўна.
Дзяніс родам з Мядзельскага раёна. Скончыў фізічны факультэт БДУ, фізік-даследвальнік. Працаваў на розных прадпрыемствах, навуковым супрацоўнікам у Нацыянальным парку «Нарачанскі», але праблемы ўзнікалі праз яго грамадскую дзейнасць.
У 2018 годзе Краўчук праславіўся тым, што на мясцовых выбарах выкрыў каруселі падчас датэрміновага галасавання і дзякуючы гэтаму змог прагаласаваць тры разы на трох розных участках.
Цяпер хлопец знаходзіцца ў СІЗА КДБ. Родныя кажуць, што Дзяніс трымаецца нармальна, ён упэўнены ў сваёй невінаватасці.
Таксама па гэтай справе праходзяць юрыст з ЗША Юрась Зянковіч, літаратуразнаўца Аляксандр Фядута, старшыня Партыі БНФ Рыгор Кастусёў і кіраўніца мінскага офіса Зянковіча Вольга Галубовіч.
Каментары