CNN паведамляе пра падрыхтоўку Расіі да выпрабаванняў ракет «Буревестник»
У ЗША гэтыя ракеты называюць «лятучым Чарнобылем».
Згодна са спадарожнікавымі здымкамі, апублікаванымі тэлеканалам CNN, на архіпелагу Новая Зямля рыхтуюцца выпрабаванні ракет «Буревестник», якія Пуцін прэзентаваў у 2018 годзе. Гэтыя ракеты маюць ядзерную энергетычную ўстаноўку.
Па словах экспертаў з Інстытута міжнародных даследаванняў Мідлбэры (штат Каліфорнія), фотаздымкі, зробленыя спадарожнікам ад кампаніі Capella Space, маюць пераканаўчыя доказы таму, што Расія рыхтуецца да выпрабаванняў крылатай ракеты з ядзернай устаноўкай на архіпелагу Новая Зямля. Раней на гэтай пляцоўцы ўжо праходзілі выпрабаванні ракет «Буревестник».
Па словах супрацоўніка інстытута Джэфры Льюіса, выкарыстанне ядзернай энергаўстаноўкі забяспечвае ракетам неабмежаваную далёкасць палёту, а таксама дазваляе бесперашкодна пераадольваць амерыканскія радары. Аднак разам з гэтым, выпрабаванні ракет уяўляюць сабой пагрозу для навакольнага асяроддзя і здароўя чалавека. Гэтыя рызыкі сталі прычынай, чаму некаторыя замежныя эксперты называюць гэту расійскую ракету «лятучым Чарнобылем».
У верасні 2019 года тэлеканал CNBC паведаміў, што Расія ўжо праводзіла выпрабаванні крылатых ракет. Па версіі амерыканскай разведкі, пяць выпрабаванняў скончыліся аварыямі.
Цяпер чытаюць
Адпачынак для бясстрашных і беспрынцыповых: што цяпер з турамі з Беларусі ў Крым?8
Каментары