«Наша шоу ідзе па падпісцы — падпісцы аб нявыездзе». Беларусы на ўкраінскім ТБ пажартавалі пра палітыку
На ўкраінскім гумарыстычным праекце «Ліга смеху» жартавалі пра беларускую палітыку. Каманда з Мінска «Шакіра-Шакіра» згадала пра прэзідэнцкі картэж, пасадку самалёта Rynair і закрытыя межы.
У выступленні гумарысты кажуць, што прывезлі з сабой беларускую ліслівасць і пачынаюць хваліць украінцаў.
«А серыялы ў вас якія! «Папік» — жыццёва? Жыццёва. «Сваты» — жыццёва? Жыццёва. «Слуга народа»… Для нас, канечне, фэнтэзі, але для вас жыццёва».
Другі падарунак ад каманды — беларуская малочка. На сцэну выходзіць чалавек у касцюме каровы.
«Вось яна — беларуская свяшчэнная жывёла. Проста ў нас карова, якая пераходзіць дарогу, — гэта адзінае, што можа спыніць картэж прэзідэнта».
У касцюме, паводле задумы, — маёр.
— Каб вы тут лішняга не нагаварылі, мяне да вас прыставілі проста вунь адтуль, — паказвае ён пальцам уверх.
— І пасля не кажыце, што Беларусь — гэта не рай. Мы ж пра ўладу наогул нічога дрэннага не сказалі.
— Ну вы ж хлопцы разумныя — значыць, па-любому нешта скажаце.
Пасля каманда гуляе ў імправізаванае палітычнае шоу.
— Першае пытанне: які беларус цяпер можа спакойна з’ехаць за мяжу?
— Трактар.
— Трактар «Беларус» — правільна. <…> Наступнае пытанне: як вы думаеце: колькі зойме інтэграцыя з Расіяй?
— Залежыць ад таго, колькі Расія зойме.
— Фінальнае пытанне: мусіць жа быць адэкватная прычына таму, што той самы самалёт прызямліўся ў Мінску?
— Ёсць адказ. Там, карацей… і вось ён … яму кажа, і, карацей… Усё.
— Правільна! Няма адэкватнай прычыны.
Вядоўца імправізаванай перадачы жартуе:
«Нагадваю, што наша шоу ідзе па падпісцы — па падпісцы аб нявыездзе».
Каманда «Шакіра-Шакіра» складаецца з беларускіх квз-шнікаў. Капітан — Саша Іваноў, выпускнік БДУКІ. Іншыя ўдзельнікі — гэта гумарыст Ігар Якушаў з факультэта радыёфізікі БДУ, актрыса Наталля Шульжэнка з Харкаўскага ўніверсітэта культуры і гулец у футзал Мікалай Данэйка.
Ці гатовы Кавалеўскі весці перамовы з Віктарам Лукашэнкам?24
Каментары