Дзяржава ўвяла патрабаванні да фізічных асоб, яны мусяць мець дакументы на тавар, нават калі прадаюць гародніну, вырашчаную на сваім участку.
Урад 10 снежня прыняў папраўкі ў пастанову «аб функцыянаванні рынкаў», піша thinktanks.by
Прадаўцы — фізічныя асобы абавязаныя мець пры сабе даведку, выдадзеную мясцовым выканаўчым і распарадчым органам. Даведка павінна пацвярджаць, што прадукцыя вырашчаная (вырабленая) на зямельным участку, што знаходзіцца на тэрыторыі Беларусі.
Вось што нельга будзе прадаваць на рынку без гэтай даведкі:
— Гародніну і садавіну, у тым ліку ў перапрацаваным выглядзе (варэнні, кампоты, джэмы і г. д.).
— Іншую прадукцыю раслінаводства (за выключэннем дэкаратыўных раслін і кветак, іх насення і расады) — гэта значыць, пятрушку, цыбулю, сельдзярэй, салату і г.д.
— малочныя і кісламалочныя прадукты, у тым ліку ў перапрацаваным выглядзе — сыры, тварог, масла і г. д.
— прадукцыю пчалярства — мёд, пярга, воск і г. д.
— іншую прадукцыю жывёлагадоўлі (акрамя пушніны), — гэта значыць, мясныя прадукты, сала, каўбасы, яйкі і г. д.
Адміністрацыя рынка можа ў любы момант запатрабаваць паказаць такую даведку. І калі ў прадаўца яе не будзе, то з ім могуць скасаваць дагавор аб прадастаўленні гандлёвага месца. Колькі будзе каштаваць даведка, пакуль не вядома.
Каментары