З 1 верасня 2026 года ў беларускіх школьных сталовых плануюць змяніць арганізацыю харчавання. Асноўную ўвагу будуць надаваць другім стравам, салатам і напоям, а супы больш не будуць абавязковай часткай меню, піша Times.by.
Таксама зменіцца падзел вучняў па ўзроставых групах для разліку нормаў харчавання. Замест дзвюх катэгорый (6—10 гадоў і 11—18 гадоў) увядуць тры: вучні 1—4-х, 5—7‑х і 8—11‑х класаў. Гэта павінна дазволіць лепш улічваць патрэбы дзяцей розных узростаў.
У школьным меню стане больш свежай гародніны і зеляніны, якія беларускія вытворцы могуць пастаўляць цягам усяго года. Адначасова шырэй будуць выкарыстоўвацца гатовыя паўфабрыкаты беларускай вытворчасці: катлеты, нагетсы, біточкі, пельмені, бліны і іншыя вырабы. Урад абяцае, што для школ будуць адбіраць толькі тыя прадукты, якія адпавядаюць патрабаванням бяспекі і якасці.
Намесніца прэм'ер-міністра Наталля Пяткевіч на адмысловым круглым стале адзначыла, што санітарныя патрабаванні да школьнага харчавання таксама плануюць перагледзець, каб зрабіць сістэму больш гнуткай і прыстасаванай да сучасных звычак. Паводле яе слоў, сённяшнія бацькі і дзеці харчуюцца інакш, чым некалькі дзесяцігоддзяў таму, таму штодзённы суп або абавязковая рыба ў пэўны дзень ужо не адпавядаюць сучаснай мадэлі харчавання.
Паводле прыведзеных даных, за апошні год пастаўкі мясных рубленых паўфабрыкатаў для школьных сталовых павялічыліся больш чым у тры разы — са 135,5 % да 329 %.
Папярэдняя рэформа школьнага харчавання ў Беларусі пачала дзейнічаць з 1 верасня 2024 года. Тады было распрацавана каля 400 новых страў з улікам густаў дзяцей і прынцыпаў здаровага харчавання. Новыя змены павінны стаць працягам гэтай рэформы.
Цяпер чытаюць
«Я супрацоўнік КДБ, у вас будуць праблемы». Мінчанка хацела напісаць скаргу ў оптыцы, але супрацоўніца паказала корачку21
Каментары
Скажыце прывітанне залішняй вазе са сваімі нагетсамі і пельменямі.