Ціханоўская vs Лукашэнка. Параўноўваем з мінулым годам прагляды тэлезваротаў і навагодніх шоу

За першыя 24 гадзіны відэазварот Святланы Ціханоўскай сабраў 711 тысяч праглядаў на чатырох асноўных ютуб-каналах, якія яго транслявалі.

418 тысяч чалавек паглядзелі яго ў ютуб-канале самой Ціханоўскай. У мінулым годзе за тыя ж 24 гадзіны там было 263 тысячы праглядаў.У гэтым годзе пад зваротам за суткі там паставілі 31 тысячу лайкаў.

Зварот набраў 127 тысяч праглядаў на канале «Белсата», 123 тысячы разоў на канале «Краіна для жыцця» і 43 тысячы на канале радыё «Свабода».

«За суткі навагодні зварот паглядзелі мінімум 1,26 млн разоў на Фэйсбуку, YouTube, Odnoklassniki, Telegram і Instagram», — прыводзіць ў сябе ў фэйсбуку статыстыку дарадца Ціханоўскай Франак Вячорка. 

Акрамя таго, відэазварот дэманстраваўся на шэрагу «доўгіх» навагодніх ютуб-шоу. 

Іх выбар быў трохі меншы, чым год таму. Колькі людзей аддалі ім перавагу перад традыцыйным тэлебачаннем і чые шоу сталі самымі папулярнымі? 

Шоу канала Сцяпана Пуцілы, як і год таму, — безумоўны лідар. Яго аналітычна-забаўляльны навагодні стрым сабраў 220 тысяч праглядаў. Але гэта радыкальна менш, чым у мінулым годзе, калі праглядаў за суткі было 406 тысяч.

У амаль 7-гадзіннай праграме давалі слова як палітыкам, так і зоркам інтэрнэта, у перабіўках спяваў NaviBand і ўспаміналі падзеі года.

Навагодні вечар-2022 з «Белсатам» набраў 114 тысяч праглядаў (у мінулым годзе было 88 тысяч), а іх чароўны навагодні мюзікл «Вяртанне дадому» — яшчэ 113 тысяч.

Размоўна-музычнае шоу «Новогодний эфир // Malanka.live» сабрала 43 тысячы праглядаў (год таму было 66 тысяч).

Навагодна. Святочны special: Такінданг, Башлыкевіч, Iva Sativa, «Бачу ўпершыню» на канале «Годна» — 5 тысяч праглядаў. У мінулым годзе ў арыентаванай на моладзь праграмы «Годна» было 53 тысячы праглядаў. 

Столькі ж, каля 5000, у гумарыстычнай «Новогодне-аналитической передачи «ЧинЧинЧас».

«Сумленныя людзі» і «Краіна для жыцця», у адрозненне ад мінулага года, навагодніх праграм не стварылі.

Разам навагоднія ютуб-шоу сабралі каля 500 тысяч праглядаў. Нашмат менш, чым у мінулым годзе, калі іх за той жа час праглядаў было 915 тысяч. 

Колькі глядзелі «Белсат» праз спадарожнік, звестак няма.

Параўноўваць колькасць праглядаў зваротаў Аляксандра Лукашэнкі і Ціханоўскай у Ютубе (у Лукашэнкі ў тры разы менш праглядаў і ў дзясяткі разоў менш лайкаў) — напэўна, не карэктна, бо Лукашэнку глядзяць пераважна на тэлебачанні, дзе ён, у адрозненне ад Ціханоўскай, татальна даступны. Але лічбы Ютуба паказваюць, што грамадства хоча мець здаровую альтэрнатыву анітрохі не менш, чым год таму.

• 0
• 0
• 0
• 0
• 0
• 0
• 0
• 0