Як рэдактар «Нашай Нівы», я вымушаны карыстацца VPN-ам увесь час. У нашых умовах гэта прафесійная патрэба. Я прыйшоў да высновы, што на камп’ютары, ноўтбуку сама зручна — проста паставіць сабе браўзер Opera.
У ім ёсць выключна зручная функцыя. Выбіраеш «прыватнае акно» (яго на іншых браўзерах яшчэ называюць «рэжым інкогніта»:
А ў ім злева ад акенца, дзе набіраем адрас сайта ёсць такі пераключальнік-паўзунок «Уключыць VPN»
І «выключыць VPN»:
Я, калі працую, проста трымаю Оперу з VPN — уключаным.
Такім чынам я без затрат часу праглядаю старонкі, даступныя ў Беларусі толькі праз VPN. Я працую ў Сафары са звычайнымі старонкамі, а, як толькі трэба залезці праз VPN, пераходжу ў Оперу.
Гэта добра і тым, што не трэба спампоўваць ніякі VPN сабе на камп’ютар.
У Оперы можна ўключаць VPN і ў звычайным акне, не ў прыватным, але ў прыватным плюс яшчэ ў тым, што там таксама аўтаматычна вычышчаецца гісторыя наведванняў, не трэба гэтага рабіць уручную.
Хуткасць пры падключэнні праз VPN Оперы цалкам добрая, відэа нармальна глядзець. VPN Оперы падключаецца стабільна праз проксі ў Швецыі. Але можна выбіраць сабе і проксі любой іншай краіны.
«Опера» — браўзер, распрацаваны нарвегамі, ён якасна працуе, не горш за Хром, Фаерфокс і Сафары.
Каб паставіць яго сабе на камп'ютары ці ноўтбуку, проста заходзім на сайт Opera.com і націскаем «Загрузіць Оперу».
У некаторых версіях браўзера Google Chrome таксама прысутнічае бясплатны VPN.
Для яго актывацыі неабходна націснуць на значок «расширения» у правым верхнім куце, выбраць VPN.
Адно націсканне — і VPN актыўны.
У мабільнай версіі Оперы на Андроідзе VPN уключаецца ў наладах.
Працуе VPN і ў мабільнай версіі Оперы на iOS, вы знойдзеце функцыю ў наладах.
Калі ж усталёўваць VPN на мабільніку, магу парэкамендаваць ProtonVPN. Ëн створаны той жа камандай, якая робіць вельмі надзейны Protonmail
— актывістамі, якія базуюцца ў Швейцарыі, і з разлікам, каб ім карысталіся людзі ў дыктатарскіх краінах. У ProtonVPN ёсць бясплатная і платная версіі. Бясплатная — нармальная, платная забяспечвае большую хуткасць, але для звычайных патрэб чытання навін і прагляду Ютуба бясплатнай цалкам дастаткова.
VPN — добрая штука, нават кітайцы нічога не могуць з ім зрабіць. Увесь Кітай сядзіць у інтэрнэце праз VPNы.
Чытайце таксама: Інтэрнэт з дапамогай VPN — ці насамрэч гэта бяспечна?
Вось тут мы можна прачытаць пра VPN больш.
Каментары