Расійская Асацыяцыя міжнародных аўтаперавозчыкаў (АСМАП) паскардзілася намесніку міністра замежных спраў РФ Андрэю Рудэнку на доўгія чэргі ў пунктах пропуску на мяжы Беларусі з ЕС.
Копію звароту перавозчыкі даслалі ў рэдакцыю Zerkalo.io.
Асацыяцыя міжнародных аўтамабільных перавозчыкаў піша аб шматлікіх скаргах кіроўцаў фур «у сувязі з тэрмінамі перасячэння беларускага ўчастка мяжы з ЕС, якія павялічыіліся са снежня 2021 года».
Па іх словах, электронная чарга ў пунктах пропуску недастаткова прадуманая і толькі пагаршае сітуацыю. Так, запіс у яе адкрываецца за 14 сутак да перасячэння мяжы, і ўсе месцы браніруюцца за некалькі хвілін. У выніку расійскім перавозчыкам прыходзіцца стаяць у парадку жывой чаргі. У апошні час тэрмін чакання складае да 7 сутак. Да таго ж аўтамабілі беларускіх транспартных кампаній у шэрагу выпадкаў афармляюцца па-за чаргой, піша АСМАП, што прыводзіць да канфліктаў паміж кіроўцамі.
У лісце Асацыяцыя паказвае на праблему з боку непасрэдна беларускай мяжы: па іх словах, пры прапускной здольнасці пункта «Каменны Лог» у 500 машын у суткі, там афармляюць толькі 300—400 фур.
Пэўнай праблемай стала і ўвядзенне Беларуссю навігацыйных пломбаў пры ўвозе тавару з Літвы або Польшчы. Гэта прывяло да значных фінансавых выдаткаў: як на самі пломбы (каля 115 еўра), так і ў сувязі з прастоем пры ўездзе ў беларускія пункты пропуску.
Многія кіроўцы, піша асацыяцыя, не вытрымліваюць такога вымотваючага рэжыму працы і звальняюцца. АСМАП просіць МЗС РФ дапамагчы з урэгуляваннем сітуацыі і накіраваць адпаведны зварот у кампетэнтныя беларускія органы.
Нагадаем, раней прычыну такіх чэргаў у ДПК тлумачылі тым, што краіны-суседзі «не ў поўнай меры выконваюць абавязкі па пропуску грузавікоў праз мяжу». Так, па звестках ведамства, 28 студзеня польскія памежнікі аформілі толькі 62% фур ад нормы, літоўскія — 70%, латвійскія — 85%.
На гэты момант у чарзе на мяжы на выезд у ЕС знаходзіцца больш за 4380 фур.
Цяпер чытаюць
31‑гадовы расіянін акруціў 17‑гадовую беларуску. Фінал гісторыі страшны: турма за наркотыкі, смерць дзіцяці, «СВА» і скрадзеныя грабавыя9
Каментары