Літва прапануе стварэнне гуманітарнага калідора праз Беларусь для вывазу ўкраінскага зерня
У Літве лічаць магчымым вывозіць зерне з Украіны з дапамогай гуманітарнага калідора праз Беларусь. Пра гэта 10 мая заявіў міністр транспарту Літвы Марыус Скуодзіс, піша Bns.lt.
Чаму гэта важна? Міжнародная супольнасць кажа пра недахоп харчоў у свеце праз немагчымасць экспарту ўкраінскага зерня.
Міністр транспарту Літвы прапанаваў два варыянты:
- Разблакаваць украінскія парты, каб дастаўляць зерне караблямі;
- Перавозіць зерне праз Беларусь. Гэта патрабуе стварэння гуманітарнага калідора.
Паводле Скуодзіса, ужо вядуцца перамовы пра гуманітарны калідор праз Беларусь, «але тут трэба браць на сябе адказнасць міжнародным інстытутам, такім як ААН ці Еўракамісія».
Міністр транспарту Літвы дадаў, што шлях праз Беларусь зручны, бо на ўсім ім выкарыстоўваецца адна і тая ж чыгуначная каляіна. Цяперашнія ж пастаўкі праз Польшчу, ускладняюцца неабходнасцю змены цягнікоў на ўкраінска-польскай і польска-літоўскай межах, бо ў Польшчы выкарыстоўваецца еўрапейская каляіна. Гэта абмяжоўвае аб’ёмы паставак праз Польшчу.
Украінскія парты заблакаваныя з-за вайны. З 24 лютага суднаходства на Чорным моры спынілася праз дзеянні Расіі. У партах заблакавана каля 70 караблёў і 90 млн тон аграрнай прадукцыі, паведаміў 9 мая прэм'ер-міністр Украіны Дзяніс Шмыгаль. Праз гэта Украіна штодня губляе па 170 млн даляраў, а свет недаатрымлівае прадукты, што вядзе да росту цэн на прадукты і спажывецкага крызісу. ААН 7 мая заклікала разблакаваць украінскія парты, каб пазбегнуць голаду ў свеце.
Падпалкоўніка з факультэта вайсковай разведкі судзяць за «здраду дзяржаве» па справе, якая выглядае палітычнай. Што пра яго вядома?6
Каментары