Маскоўскія дэпутаты прапанавалі назваць тэрыторыю каля амбасады ЗША плошчай Абаронцаў Данбаса. Амерыканцы не супраць
Дэпутаты Маскоўскай гарадской думы прапанавалі назваць тэрыторыю каля амбасады ЗША ў Маскве «плошчай Абаронцаў Данбаса» і прысвоіць амбасадзе такі адрас. Але не зразумелі двухсэнсоўнасці гэтай прапановы. У адрозненне ад амерыканцаў.
З ініцыятывай назваць у гонар «абаронцаў Данбаса» безыменную тэрыторыю на скрыжаванні Вялікага Дзевяцінскага завулка і Канюшкоўскай вуліцы выступілі чатыры дэпутацкія аб'яднанні ў Масгардуме «Адзіная Расія», КПРФ, «Справядлівая Расія» і «Мая Масква». Прапанову яны накіравалі ва ўрад Масквы.
Таксама маскоўскія дэпутаты папрасілі прысвоіць афіцыйны адрас менавіта на «плошчы абаронцаў Данбаса» Амбасадзе ЗША ў Расіі.
Амерыканская амбасада адрэагавала на навіну з гумарам:
«Здзіўленыя, але не абураныя прапановай урада РФ перайменаваць частку цэнтра Масквы каля амбасады ЗША ў «плошчу Абаронцаў Данбаса» — як мяркуецца, у гонар украінскіх салдат, якія мужна абараняюць сваю радзіму ад крамлёўскай агрэсіі. Краіна павінна ведаць сваіх герояў».
Каментары