Чацвёрты месяц працягваецца расійская ваенная агрэсія ва Украіне. Беларусы гінуць з абодвух бакоў фронту расійска-ўкраінскай вайны.
Беларусы, якія бяруць удзел у баявых дзеяннях на баку УСУ, сфармавалі свой полк імя Кастуся Каліноўскага. Вядома пра смерць ужо шасці грамадзян Беларусі, якія баранілі цэласнасць і незалежнасць Украіны. Не стала Ільі «Літвіна» Хрэнава, Аляксея «Тура» Скоблі, Змітра «Тэрора» Апанасовіча, Змітра «Ганса» Рубашэўскага, Канстанціна «Фенікса» Дзюбайлы і Паўла «Волата».
Але ёсць звязаныя з Беларуссю вайскоўцы, якія ваююць і на баку Расіі. Хоць пра іх значна радзей пішуць, але сярод гэтых людзей таксама ёсць чалавечыя страты. «Свабода» знайшла звесткі аб пяці ўраджэнцах Беларусі, якія загінулі ва Украіне. Магчыма, гэты спіс няпоўны.
Пётр Лузанаў (33 гады)
Загінуў 24 сакавіка, у той жа дзень, што і Зміцер «Тэрор» Апанасовіч. На сайтах так званай «Наваросіі» пра Лузанава напісана, што ён быў намеснікам камандзіра батальёна, капітанам.
Сам Лузанаў родам з Мазыра, вучыўся ў Вайсковай акадэміі ў Мінску (год выпуску 2012). Меў пазыўны «Пятровіч».
У сацсетках месцам жыхарства Лузанава пазначаны Дакучаеўск Данецкай вобласці, там у яго засталася жонка. Служыў у вайсковай частцы №08805 Данецка.
Загінуў паблізу Марыупаля, калі група танкаў пад кіраўніцтвам Лузанава натрапіла на праціўніка.
Павал Яўглеўскі (51 год)
Нарадзіўся ў Лідзе, у Гродзенскай вобласці. Удзельнічаў у вайне на ўсходзе Украіны з 2014 года, у 2015-м быў паранены.
Пазыўны — «Кадэт». Вучыўся ў Мінскім сувораўскім вучылішчы, потым у Данецкім вышэйшым вайскова-палітычным вучылішчы. Гаварыў, што стаў вайскоўцам па слядах бацькі.
Загінуў 9 красавіка, калі батальён «народнай міліцыі ДНР» пад кіраўніцтвам Яўглеўскага паспрабаваў атакаваць пазіцыю байцоў «Азова» ў Марыупалі.
Ілля Курналёў (21 год)
Пазыўны «Беларус». Загінуў 30 сакавіка. Родам з Ганцавічаў, але сям’я пераехала ў Данецк. У Беларусі засталося шмат сваякоў.
«Дзякуй, што абараняў нас», — напісала ў сацсетках яго сястра Хрысціна.
Уладзіслаў Чарноў (25 гадоў)
Малодшы сяржант расійскага войска. Нарадзіўся ў Магілёўскай вобласці, але ў двухгадовым узросце сям’я пераехала ў Тамбоўскую вобласць Расіі.
Па адукацыі быў майстрам па абслугоўванні і рамонце аўтамабіляў. У 2016 годзе быў прызваны ў армію. Дэмабілізаваўся, але ў 2020-м пайшоў у войска на кантракт. Служыў у Ленінградскай вобласці.
Загінуў 28 сакавіка. Узнагароджаны пасмяротна расійскім ордэнам Мужнасці.
Мікалай Маркаў (67 гадоў)
Палкоўнік авіяцыі Рэспублікі Беларусь, жыў у Лідзе. Скончыў Чарнігаўскае вышэйшае вайскова-авіяцыйнае вучылішча. Спачатку служыў у Казахстане і ГДР, а потым у Паставах і Лідзе.
Быў штурманам палка. Вядома, што Маркаў ездзіў на заробкі ў Афрыку. У складзе якога падраздзялення ён ваяваў ва Украіне, невядома. Збіты 12 мая над Папаснай Луганскай вобласці. Пахаваны ў Лідзе.
Цяпер чытаюць
Ціханоўскі: Ціханоўскай можна было ў 2020‑м не пабаяцца турмы. І, можа, у беларусаў быў бы шанец137
Каментары