Журналіст Дзмітрый Гурневіч, гартаючы стужку навін ад БелТА, звярнуў увагу на прапагандысцкі перапост нібыта з польскага тэлеграм-канала і тлумачыць у фэйсбуку, чаму відавочны фэйк тут нават не так сама інфармацыя, як яе крыніца.
На Белце навіна: Польские Telegram-каналы учат своих подписчиков, как замораживать хлеб, чтобы он сохранился подольше.
Пакінем у баку той факт, што тэлеграм увогуле не з'яўляецца для палякаў крыніцай інфармацыі. Для іх тэлеграм — гэта як для беларусаў Tumblr: можа, чулі, пару тысяч ці дзесяткаў нават раз ці два былі, але не больш за тое.
Ну, але дапусцім, нехта ў Беларусі верыць, што мільёны палякаў там завісаюць (польскія СМІ і блогеры там проста не прысутнічаюць). Заходзім па спасылцы далей — яна вядзе на старонку Салаўёва. У яго, у сваю чаргу, няма ніякіх спасылак на тэлеграм-каналы, а ёсць скрын з нейкага аднаго канала. Аднаго, хаця ў навіне фігуруюць тэлеграм-каналы ў множным ліку.
Заходзім у той канал. У яго 9 тысяч падпісчыкаў. Знаходзім допіс з парадай замарожваць хлеб (за тры дні яго прачыталі 370 чалавек).
І што адразу чапляе? Што загалоўкі многіх допісаў у канале напісаныя з памылкамі, відавочна, што праз гуглтранслэйт, у тым ліку і згаданы, пра хлеб. Там памылка, якую паляк проста не можа дапусціць. Сам тэкст допісу таксама зроблены абы-як, аўтар нібыта спасылаецца на нейкі партал, але сам партал не называецца.
Відавочна, што аўтар скапіяваў тэкст з польскай навіны, але не да канца зразумеў усе выразы і таму не палічыў неабходным, каб яго падкарэктаваць. Прыдумаў сенсацыйны загаловак, пераклаў праз не ідэальны гугл і выставіў як ёсць, бо паляка, каб праверыць, побач не было.
Відавочна, што каб цытаваць «гарачыя навіны», прапагандысты самі ствараюць «СМІ», якія яны цытуюць. Але робіцца гэта настолькі брудна і прымітыўна, што нават цяжка ўявіць адрасата такіх фэйкаў, калі гэта не шчырыя чытачы Белты і Салаўёва, што само па сабе дыягназ.
Каментары