У Магілёве апаганеная драўляная скульптура «Тая, што нясе крыж», якую ў канцы 80‑х вырабіў і падарыў гораду да гадавіны Чарнобыльскай катастрофы мінскі скульптар Аляксандр Фінскі.
Працу Фінскага ўсталявалі ў скверы на праспекце Міру, дзе да 60‑х гадоў былі могілкі. Цяпер гэта ўлюбёнае месца адпачынку магілёўцаў. Наведнікі сквера сцвярджаюць, што скульптура ляжыць пад дрэвам каля месяца.
Чаму паваленую скульптуру, якая знаходзіцца на адной з ажыўленых магістралей горада, за трыста метраў ад будынка аблвыканкама, не паставілі на месца, высвятляць давялося доўга.
У аддзеле культуры гарвыканкама паабяцалі з гэтым пытаннем разабрацца і параілі патэлефанаваць у дарожна‑маставое прадпрыемства. Яго супрацоўнік здзівіўся: «Яна ўсталявана была на зялёнай зоне і зроблена з дрэва? Гэта не наша спецыфіка — за гэта адказвае Магілёўзеленгас».
У сваю чаргу, супрацоўніца зеленгаса абвінаваціла ў вандалізме дарожна‑маставое прадпрыемства: «Гэтую скульптуру спілавала дарожна‑маставое прадпрыемства і не вывезла. Я гэта ведаю. Чаму яны яе спілавалі, хто даў такое распараджэнне — тэлефануйце лепш у наша прадпрыемства камунальных прадпрыемстваў».
Высветліць, хто загадаў знішчыць падарунак мінскага скульптара, так і не ўдалося. Чыноўнікі ў гарвыканкаме паабяцалі разабрацца.
Аляксандр Фінскі вырабіў сваю скульптуру з дубу на чарнобыльскім пленэры ў 1989 годзе. У тым жа годзе яе ўсталявалі ў скверы. «Тая, што нясе крыж» — адзіная праца, якую ён падарыў Магілёву. Навіна пра яе апаганенне абурыла мастака: «Я паспрабую звязацца з галоўным архітэктарам Магілёва і выказаць яму сваё стаўленне да гэтага ўсяго. Я зрабіў працу, дзяржава мне за гэта грошы плаціла, а цяпер высвятляецца, што гэта нікому не патрэбна. Канцоў зараз не знойдзеш. Яны ж разумеюць, што гэта недзе прагучыць. Будуць хавацца адзін за аднаго».
Працы Аляксандра Фінскага ўпрыгожваюць Мінск, Нясвіж, а таксама Пекін, Маскву, шэраг гарадоў Аўстрыі.
Цяпер чытаюць
Бабарыка заявіў пра вяртанне ў палітыку і назваў вінаватага ў тым, што змены не адбыліся ў 2020-м38
Бабарыка заявіў пра вяртанне ў палітыку і назваў вінаватага ў тым, што змены не адбыліся ў 2020-м
Дзеці злізвалі з бруднай падлогі пралітае малако. Якой пабачыў замежнік Беларусь, спустошаную расійскімі і шведскімі войскамі ў час Паўночнай вайны1212
Каментары