NASA плануе да 2032 года развярнуць на Месяцы жылую станцыю

НАСА паведаміла падрабязнасці пра рабатызаваныя пасадачныя модулі, «скачучыя» дроны і апараты, якія плануецца адправіць на Месяц у рамках амерыканскіх планаў па стварэнні месяцовай базы, піша Бі-бі-сі.

Касмічная кампанія заснавальніка Amazon Джэфа Безаса Blue Origin — адна з некалькіх кампаній, абраных для стварэння гэтых апаратаў.

ЗША хочуць вярнуць амерыканцаў на Месяц да таго, як прэзідэнт Дональд Трамп пакіне сваю пасаду ў 2028 годзе.

Аднак НАСА канкуруе з Кітаем за вяртанне людзей на Месяц, а гэта значыць, што касмічнае агенцтва знаходзіцца пад ціскам, каб выглядаць пераможцам у новай касмічнай гонцы.

Кітай прасоўваецца наперад са сваімі планамі па высадцы людзей на Месяц да 2030 года.

У панядзелак ён запусціў свой касмічны карабель «Шэньчжоў-23», адправіўшы экіпаж астранаўтаў на кітайскую арбітальную станцыю «Цяньгун».

У сакавіку НАСА абвясціла пра праграму коштам 20 млрд долараў па будаўніцтве да 2032 года пастаяннай базы на паўднёвым полюсе Месяца, якая працуе на ядзернай і сонечнай энергіі.

Кіраўнік НАСА Джарэд Айзекман заявіў у аўторак, што ЗША «ніколі больш не адмовяцца ад Месяца».

Стварэнне базы на Месяцы дазволіла б ЗША праводзіць навуковыя эксперыменты, патэнцыйна здабываць каштоўныя рэсурсы і зрабіць палёты на Марс больш простымі.

Аднак большасць экспертаў згодныя з тым, што абазначаныя НАСА тэрміны нерэалістычныя.

Нягледзячы на поспех ЗША з адпраўкай чатырох астранаўтаў вакол Месяца ў рамках місіі «Артэміда II» у красавіку, некаторыя навукоўцы лічаць, што Кітай, хутчэй за ўсё, стане наступнай краінай, якая высадзіць людзей на месяцовую паверхню.

«Мяне ніколькі не здзівіць, калі Кітай зробіць гэта першым», — сказаў Бі-бі-сі Сімеон Барбер, спецыяліст па месяцовых даследаваннях з брытанскага Адкрытага ўніверсітэта, спасылаючыся на няўдачы НАСА ў забеспячэнні магчымасці высадкі чалавека на Месяц.

Праграма Ignition Moon Base складаецца з трох этапаў.

Перш чым адправіцца на Месяц з экіпажам, НАСА хоча адправіць туды рабатызаваныя пасадачныя модулі і «скачучыя» дроны для даследаванняў і картаграфавання складанага рэльефу Месяца.

Плануецца таксама выкарыстоўваць транспартныя сродкі, здольныя перамяшчаць астранаўтаў па месяцовай паверхні і несці сродкі сувязі і навуковыя прыборы.

У аўторак НАСА заявіла, што кантракты на стварэнне гэтых машын дастануцца такім кампаніям, як Blue Origin, Intuitive Machines і Astrobotic.

Павялічыць

Па задумцы НАСА, месяцовы пасадачны модуль кампаніі Blue Origin пад назвай Endurance мог бы ажыццяўляць дакладныя пасадкі, а таксама аўтаномную навігацыю і кіраванне.

Пасадачны модуль Griffin-1 кампаніі Astrobotic, як мяркуецца, здзейсніць пасадку ў кратэры Нобіле недалёка ад Паўднёвага полюса.

Гэтыя апараты таксама даставяць навуковыя прыборы, уключаючы камеры высокай раздзяляльнасці і інструменты, якія выкарыстоўваюць адлюстраванае лазернае святло пры пасадцы.

Гэтая рабатызаваная даследчая праграма павінна працягнуцца да 2029 года, у рамках якой на Месяц будзе ажыццёўлена 25 запускаў і дастаўлена 4 тоны грузу, заявіў у аўторак кіраўнік праграмы месяцовых баз Карлас Гарсія-Галан.

Далей НАСА плануе пабудаваць на Месяцы ядзерныя і сонечныя энергетычныя ўстаноўкі, уключаючы рэактары.

Павялічыць

Да 2032 года, як разлічваюць у НАСА, людзі маглі б жыць на Месяцы ў «паўпастаянных» месцах для жылля.

Месяцовыя ўсюдыходы дазволілі б астранаўтам пераадольваць вялікія адлегласці па камяністай паверхні.

Паўднёвы полюс Месяца асабліва прывабны, паколькі замерзлая вада магла б выкарыстоўвацца для піцця або вытворчасці кіслароду.

Аднак планы НАСА залежаць ад гатоўнасці касмічнага карабля, здольнага бяспечна даставіць людзей на Месяц.

Кампанія Ілана Маска SpaceX атрымала кантракт на стварэнне касмічнага карабля пад назвай Starship Human Landing System, але сутыкнулася з шматлікімі цяжкасцямі і затрымкамі.

«Абмяжоўвальным фактарам застаецца высадка астранаўтаў на паверхню, — каментуе Барбер. — Як мне здаецца, [НАСА] адчувае, што ім пара пачаць гаварыць пра наяўнасць планаў. Таму я думаю, што за гэтым ёсць вялікая палітычная падаплёка».

• 0
• 0
• 1
• 1
• 0
• 0
• 0
• 0