Уласны ліфт, дыска-пакой і блакітныя елкі. Якія катэджы здаюць у Мінску за 5—8 тысяч даляраў за месяц
«Ідэальна падыдзе для размяшчэння пасольства», — рэкламуе адна з аб'яў. Паглядзелі, якія катэджы па стаўках ад 5 000 даляраў за месяц пражывання здаюць у сталіцы і прыгарадзе.
Дом з ліфтам
Самы дарагі з прапанаваных катэджаў для доўгатэрміновай арэнды знаходзіцца ў Тарасаве. Кожны месяц за прыжыванне ў 4-павярховым доме з ліфтам давядзецца выкладаць ажно 8 000 даляраў!
Дом з агульнай плошчай 690 м² цалкам гатовы для камфортнага пражывання, у ім ёсць чатыры спальні, тры гардэробныя пакоі з убудаванымі сістэмамі захоўвання, тры санвузлы, пральня і трэнажорная зала, абсталяваная трэнажорамі NordicTrack. Аўтамабілі таго, хто будзе гатовы выдаткаваць 8000 даляраў за месяц арэнды жылля, будуць стаяць у гаражы з ацяпленнем.
«Выдатнае размяшчэнне ў экалагічна чыстым раёне ў элітным і камфортным пасёлку Тарасава. Выкананы дызайнерскі рамонт з прэміяльных якасных матэрыялаў, мэбля італьянскай вытворчасці з заказных пазіцый, убудаваная тэхніка і сантэхніка прэміум-класа», — гаворыцца ў апісанні аб'екта.
Па перыметры ўчастка памерам 15 сотак вядзецца відэаназіранне, якое працягне працаваць нават у выпадку адключэння электрычнасці ў раёне, паколькі дом абсталяваны крыніцай бесперабойнага аварыйнага забеспячэння на 6 кВт.
Апроч гэтага, дом абсталяваны сістэмай кандыцыянавання і ўвільгатнення паветра, ёсць свая свідравіна з артэзіянскай вадой.
Калі некаму вельмі спадабаецца жыць у гэтым доме, то ён зможа яго набыць. Цана на бягучы момант не пазначаная, але вядома, што ў маі прасілі амаль 1,4 мільёна даляраў. Па стане на канец вясны, гэты дом замыкаў тройку самых дарагіх катэджаў Беларусі з выстаўленых тады на продаж.
Дыска-пакой на цокальным паверсе
Усяго на даляр танней просяць за месяц пражывання ў Драздах. Па стаўцы 7 999 даляраў за месяц можна арэндаваць дом з агульнай плошчай 487 м².
У апісанні да аб'екта пазначана, што дом і 10 сотак зямлі знаходзяцца ў адным з самых прэстыжных раёнаў сталіцы, у крокавай даступнасці ад вадасховішча і лесапарку «Дразды».
Дом таксама цалкам гатовы да засялення і пражывання. Рамонт у ім выкананы ў класічным стылі. На першым паверсе размяшчаецца вялікая кухня-сталовая з выхадам на тэрасу, гасцёўня з камінам, кабінет і СПА-зона з басейнам і саўнай, гасцявы пакой з санвузлом.
На другім паверсе месцяцца тры спальныя пакоі, два санвузлы і ванны пакой. На цокальным паверсе ёсць дыска-пакой.
Уся мэбля і сантэхніка італьянскай вытворчасці прэміум-сегмента, кухонная тэхніка Smeg, саўна Klafs. У доме ўсталяваная сістэма фільтрацыі і змякчэння вады, відэаназіранне, сігналізацыя, ёсць вялікі гараж. Тэрыторыя вакол дома выбрукаваная натуральным каменем, выкананы ландшафтны дызайн, гаворыцца ў апісанні.
Балконы з відам на вадасховішча
Трэці па дарагавізне арэндны дом таксама знаходзіцца ў Драздах. За месяц арэнды гаспадары хочуць атрымліваць ад арандатараў 6 500 даляраў.
Агульная плошча дома 474,4 м². Месціцца ён на ўчастку памерам 24 соткі. Катэдж знаходзіцца блізютка ад лесу і Свіслачы. Любавацца вадасховішчам можна наўпрост з аднаго з вялікіх балконаў.
«Уся мэбля і сантэхніка італьянскай і нямецкай вытворчасці прэміум-сегмента. Ёсць асобны пакой з джакузі, більярдная. Тэрыторыя вакол дома аформлена з дапамогай ландшафтнага дызайнера», — гаворыцца ў апісанні.
Памяшканне для спартыўнай залы
Яшчэ на паўтары тысячы даляраў танней здаюць дом у цэнтральнай частцы Драздоў. За арэнду дома плошчай 390 м² гаспадары просяць 5 000 даляраў за месяц.
У апісанні да аб'екта пазначана, што ў доме чатыры спальні, прасторная гасцёўня з кухняй, камінам і тэрасай. Ёсць уся неабходная бытавая тэхніка. На цокальным паверсе месціцца памяшканне для спартыўнай залы. Таксама ёсць цёплы гараж для аўто.
«Ідэальна падыдзе для размяшчэння пасольства»
Яшчэ адзін катэдж за 5 000 даляраў за месяц здаюць у трэцім завулку Мажайскага. Агульная плошча дома складае 600 м². На тэрыторыі дома ёсць джакузі, басейн, зона для адпачынку і саўна. На ўчастку плошчай 13 сотак размяшчаецца крытая альтанка з зонай для барбекю і выхадам у сквер. Маецца гараж на два аўто.
Дом здаецца ў арэнду без тэхнікі і мэблі, таму заплаціць 5 000 даляраў і адразу засяліцца не атрымаецца.
У апісанні прадавец пазначае, што гэты дом падыдзе не толькі для камфортнага пражывання вялікай сям'і, але і для размяшчэння пасольства, прыватнай школы або дзіцячага садка, вядзення бізнэсу і г.д.
«Прапанаваны варыянт — цудоўная магчымасць жыць, працаваць і адпачываць у ціхім месцы, але пры гэтым знаходзіцца ў цэнтры вялікага горада», — дадае аўтар аб'явы.
Мэбля і тэхніка па жаданні арандатара
Замыкае пяцёрку лідараў сярод самых дарагіх арэндных катэджаў сталіцы дом па вуліцы Падольскай. Як і ў двух папярэдніх варыянтах, гаспадары дома жадаюць атрымліваць ад арандатараў па 5 000 даляраў штомесяц.
Агульная плошча дома складае 312 м², памер участка — 10 сотак.
«Высокі плот па ўсім перыметры, дагледжаны газон, альтанка, блакітныя елкі. У доме тры жылыя ўзроўні і цокальны паверх, на якім месціцца басейн даўжынёй 13 метраў, пакой для адпачынку, душавыя і кацельня», — пазначана ў апісанні.
На ўвесь дом ёсць пяць санвузлоў. У кожным з іх і душавая кабіна, і ванна. Таксама на кожным паверсе ўсталяваныя відэадамафоны і кандыцыянеры.
За выключэннем кухні, дом здаецца без тэхнікі і мэблі, але, як пазначана ў аб'яве, гаспадар дома па жаданні наймальніка можа даўкамплектаваць пакоі неабходнай мэбляй і бытавой тэхнікай.
Наступны па дарагавізне арэндны дом у Мінску прапануюць па стаўцы 4 500 даляраў за месяц. Агулам у сталіцы здаюць у арэнду восем катэджаў па стаўцы вышэй за 3 000 даляраў.
Каментары