З мінулых выхадных у мінчукоў з'явіліся складанасці з пошукам і купляй варанай згушчонкі, піша выданне Blizko.by. Паводле інфармацыі чытачкі, ужо некалькі дзён складана знайсці гэты прадукт як у «Еўраопце», так і ў «Гіпа» ды «Віталюры». У чым можа быць прычына?
Спачатку карэспандэнт Blizko.by праверыў асартымент малочных аддзелаў у прадуктовых крамах, а таксама патэлефанаваў на гарачую лінію гандлёвых сетак і вытворцам малочных кансерваў.
Першым на чарзе быў «Еўраопт» на праспекце Дзяржынскага, 104б.
На паліцах аддзела з малочнай прадукцыяй стаіць згушчанае малако з какавай і суцэльнае абястлушчанае. Але самастойна знайсці вараную згушчонку не ўдалося, таму давялося звярнуцца па дапамогу да супрацоўніцы крамы.
«Варанай згушчонкі ў нас даўно няма, — тлумачыць прадавец. — І нават не ведаю, калі з'явіцца».
З гэтым жа пытаннем патэлефанавалі на гарачую лінію гандлёвай сеткі, дзе аператар Анастасія патлумачыла, што праблема заключаецца ў пастаўках:
«Яны да нас не прыязджаюць. Магчыма, сам вытворца не выконвае замову».
У краме «Віталюр» на Гарэцкага, 32 таксама адсутнічае вараная згушчонка. Супрацоўніца сектара клопату аб кліентах, куды Blizko.by патэлефанаваў з мэтай атрымання інфармацыі, распавяла, што адсутнасць гэтага прадукту звязаная з цяжкасцямі ў супрацоўніцтве з вытворцамі.
«Наш аддзел збыту прыкладае ўсе намаганні, каб папоўніць асартымент крам, — распавяла Ганна. — Спадзяёмся, што ў найбліжэйшы час усё наладзіцца».
У «Алмі» на Дзяржынскага, 91 і ў «Гіпа» на Гарэцкага, 2 таксама вараную згушчонку знайсці не змаглі.
Па дадатковую інфармацыю журналісты звярнуліся да вытворцаў.
Вадзім Пажарыцкі, начальнік аддзела маркетынгу «Рагачоўскага малочнакансервавага камбіната», назваў некалькі прычын узніклага дэфіцыту ў некаторых прадуктовых крамах Мінска:
«Па-першае, не ўсе сеткі ў нас заказваюць вараную згушчонку. Па-другое, магутнасці нашага абсталявання могуць вырабляць у дзень толькі 20 тон гэтага прадукту, а попыт штогод павялічваецца».
А па-трэцяе, па словах начальніка аддзела маркетынгу, у адной з гандлёвых сетак, пералічаных вышэй, маюцца праблемы з аплатай.
Начальніца аддзела збыту «Глыбоцкага малочнакансервавага камбіната» Любоў Чарапкоўская пералічыла падобныя прычыны:
«Мы пастаўляем ва ўсе сеткі, якія ў нас яе заказваюць, — падкрэсліла яна. — Акрамя тых, хто мае складанасці з аплатай».
Чытайце таксама:
«Так прасторна ў вас стала — а куды ўсе тавары дзеліся?» Што цяпер з асартыментам у невялікіх крамах
«Гэтага корму няма і больш не будзе». Што адбываецца ў зоамагазінах
Дзе выгадней купляць прадукты — на рынку, у гіпермаркеце ці ў краме каля дома?
Цяпер чытаюць
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм1818
Каментары