Хітрасці рэкламнай гульні? Затрыманы намеснік старшыні праўлення Белаграпрамбанка Віталь Крук
Прыярытэтнай версіяй затрымання сярод супрацоўнікаў лічыцца нібыта створаная Круком схема, у якой пераможцамі рэкламнай гульні банка з буйнымі прызамі станавіліся асобы, блізкія да банкіра.
Як стала вядома «Нашай Ніве», нядаўна на працоўным месцы быў затрыманы Віталь Крук — намеснік старшыні праўлення Белаграпрамбанка.
Гэтую інфармацыю нам паведамілі дзве не звязаныя між сабой крыніцы.
Прыярытэтная версія затрымання, якая цыркулюе ў калектыве, — нібыта створаная Круком схема, па якой пераможцамі рэкламнай гульні банка «Юбілейны ураджай прызоў» станавіліся блізкія да банкіра асобы.
Затрыманне Крука па часе супала з выхадам з СІЗА былога старшыні і віцэ-старшыні Белаграпрамбанка Уладзіміра Падкавырава, якога затрымлівалі напачатку 2021-га.
Таксама вядома пра затрыманне некаторых блізкіх Круку асоб.
Топ-прызамі ў «Юбілейным ураджаі прызоў» былі кватэры і машыны.
Для ўдзелу ў гульні трэба было быць укладчыкам банка.
Каментары