WSJ: Паплечнікі Пуціна хаваюць ад яго дрэнныя навіны пра вайну ва Украіне
Уладзімір Пуцін не валодае дакладнай інфармацыяй аб становішчы расійскай арміі ва Украіне, бо яго найбліжэйшае атачэнне і сілавікі хаваюць ад прэзідэнта «непрыемныя» дэталі, піша выданне The Wall Street Journal.
Высновы журналістаў заснаваныя на некалькіх месяцах зносінаў з дзейнымі і адстаўнымі функцыянерамі і выведнікамі ў Расіі і на Захадзе, а таксама з «людзьмі, блізкімі да Крамля».
Паводле крыніц WSJ, Пуцін атрымлівае пісьмовую зводку з фронту кожную раніцу, аднак, па-першае, акцэнт у ёй заўсёды робіцца на поспехах, а няўдачы згладжваюцца, а па-другое, яна часам спазняецца на некалькі дзён, паколькі праходзіць праз фільтры ФСБ, Рады Бяспекі і асабіста яе кіраўніка Мікалая Патрушава.
Апошнім часам Пуцін, як адзначае WSJ, стаў крыху больш цікавіцца рэальнай карцінай вайны, аднак «ён па-ранейшаму акружаны адміністрацыяй, якая падтрымлівае ў ім перакананасць у тым, што Расія пераможа, нягледзячы на ўсе чалавечыя і эканамічныя страты».
«Па словах былых расійскіх чыноўнікаў і людзей, блізкіх да Крамля, Пуцін поўны рашучасці прыціснуць Украіну да пазногця і гатовы дзеля гэтага на гады мабілізаваць насельніцтва і эканоміку Расіі», — піша WSJ.
У сваю чаргу, прэс-сакратар прэзідэнта РФ Дзмітрый Пяскоў у каментары выданню назваў высновы аб недасведчанасці Пуціна аб рэальнай сітуацыі на фронце «пустымі домысламі». «Любыя сцвярджэнні аб тым, што ён атрымлівае скажоную інфармацыю, не адпавядаюць рэчаіснасці», — падкрэсліў Пяскоў.
Двайнікі вядомых беларусаў. І не кажыце, што не задумваліся пра іх падабенства12
Каментары