Фантастычная прыгажосць. Звыклыя беларускія вышыўкі выглядаюць як творы сучаснага мастацтва ФОТЫ
Каманда «дэканструктараў беларускай аўтэнтыкі» «Беларускі код» прэзентавала фотапраект «Унутраная міграцыя». Атрымалася нешта па-сапраўднаму фантастычнае, піша CityDog.
Адкуль узялася гэта ідэя? І чаму «Унутраная міграцыя»?
Як прызнаюцца стваральнікі, гераінямі праекта сталі жанчыны-майстрыхі, жанчыны-мастачкі, якія выбудоўваюць мадэлі ідэальнага Сусвету ў межах сваіх хат. «Дзякуючы ім на фоне шэрасці і цяжкасці пасляваеннага аднаўлення сялянскія інтэр’еры выбухнулі сакавітымі вышытымі, маляванымі і тканымі «джунглямі» з яскравымі кветкамі, экзатычнымі жывёламі і фантастычнымі істотамі».
«Фотапраект «Унутраная міграцыя» нарадзіўся як вынік нашых разваг пра тое, адкуль у тутэйшых жанчын знаходзіліся сілы для творчасці, адкуль з’явілася патрэба ў неверагоднай яскравасці атачэння насуперак змрочнай рэчаіснасці», — піша каманда @by_kod на сваёй старонцы ў Instagram.
«Унутраная міграцыя» — бо гэта пошук бяспечных межаў для жанчыны. «Гэта дом у шырокім сэнсе, сям’я, якія жанчына ахоўвае ад метафізічных цэнтрабежных сіл. Вышытыя кветкі, экзатычныя каляровыя птушкі, райскія дрэвы — гэта спроба замяніць хібны і змрочны вонкавы свет ідэалізаваным і добразычлівым светам знутры».
У каментарыях CityDog.io стваральнікі праекта расказалі, што натхняліся рэальнымі гісторыямі ўласных бабуль і дзядуль, асабістымі экспедыцыйнымі нататкамі, кнігамі, а таксама ўласным досведам пераадолення траўмы.
«Менавіта гэты досвед і стаў падмуркам герояў, іх характараў, узаемадзеянняў. Гэта псіхалагічныя партрэты рэальных людзей з іх рэальнымі няпростымі лёсамі».
«Здымалі ўвосень проста ў полі ў экстрэмальных умовах. Хутка цямнела, таму шмат часу на выстаўленне кадра не было. Затое праз умовы змрочная, няўтульная атмасфера перадалася натуральна. Было досыць холадна, што асабліва адчулі мадэлі, і каб яны не змерзлі ўшчэнт, мы паілі іх гарачай гарбатай».
Як яны гэта рабілі?
«Што да вышывак, то гэтыя кампазіцыі кветак з інтэр’ераў сучасных вясковых хат Веткаўшчыны і Усходняга Палесся, — расказалі стваральнікі праекта CityDog.io. — Букеты былі вышытыя на навалачках, прасцінах, сурвэтках. Копіі вышывак атрымаліся дакладныя, толькі што ў іншым маштабе. Можна сказаць, што гэта рэканструкцыя.
Эскізы жаночага касцюма распрацоўваліся разам з ідэямі вышыўкі на іх. Кветкі ўкладаліся ў кампазіцыю ўздоўж рукавоў і на грудзях. Па эскізах вышываліся на раскроеных фрагментах, потым усё збіралася ў касцюм.
Вышыўка, па задуме, павінна была таксама ўпрыгожыць рэальныя фотаздымкі, таму мы інтэгравалі фота вышыўкі як элемент на этапе апрацоўкі фотаздымкаў праекта».
Хто працаваў над праектам «Унутраная міграцыя/In-Migration»
Аўтары канцэпцыі і дызайну вопраткі: каманда @by_kod
Аўтары вышываных узораў: бабулі Гомельшчыны
Вышыўка: @aksini9
Пашыў вопраткі: @old_clobbers
Фотаздымкі: @katya_kilyakova
Мадэлі: @bug_of_evol, @zhenechka_prischepova
Чытайце таксама:
Гардэроб выкладчыцы тэатральнай студыі: калекцыя мініяцюрных і дзіўных сумак — і проста прыгожыя ды рамантычныя ўборы
«Далей у планах — скарыць Нью-Ёрк». Работы гэтай беларускай керамісткі стаяць у тайваньскім музеі і ў прыватных калекцыях па ўсім свеце
У Лагойску пекар адмаўляецца прадаваць свой хлеб пакупнікам, у якіх ёсць сабакі84
Каментары