Тайвань амаль цалкам безабаронны перад паветраным нападам Кітая — злівы
Згодна са злітымі ў сетку сакрэтнымі дакументамі ЗША, востраў можа цалкам страціць сваё неба ў першы тыдзень канфлікту з Кітаем.
Тайвань з высокай верагоднасцю страціць сваё неба амаль адразу ж пасля пачатку канфлікту з Кітаем. Пра гэта стала вядома са злітых сакрэтных дакументаў ЗША, інфармацыю з якіх апублікавала выданне The Washington Post.
Паводле справаздачы, амерыканская выведка і афіцыйныя асобы Тайваня «моцна сумняваюцца» ў здольнасці сістэм супрацьпаветранай абароны вострава «дакладна» выяўляць і перахопліваць кітайскія ракеты.
У дадатак да гэтага ўлады Тайваня, згодна з уцечкай, турбуюцца адносна стану сваіх знішчальнікаў. На іх думку, толькі крыху больш за палову з усіх наяўных у іх самалётаў змогуць выконваць баявыя задачы, а ў выпадку пачатку вайны прыбраць гэтыя знішчальнікі ў сховішчы можна будзе толькі па сканчэнні аднаго тыдня.
За гэты час, як зазначана ў дакуменце, Кітай зможа поўнасцю завалодаць небам над востравам.
«Ваенна-паветраныя сілы Кітая будуць мець значна лепшыя магчымасці для ранняга ўсталявання кантролю над небам Тайваня ў выпадку масавага прымянення ракет і авіяцыі па супрацьпаветранай абароне вострава. Тут у Кітая будзе значна больш шанцаў, чым гэта было ў Расіі ў першыя дні вайны супраць Украіны», — піша The Washington Post са спасылкай на адзін са злітых сакрэтных дакументаў ЗША.
Таксама ў дакуменце пазначана, што ў амерыканскай выведкі знізілася здольнасць вызначаць магчымыя тэрміны кітайскага ўварвання на востраў, бо Кітай стаў часцей выкарыстоўваць грамадзянскія караблі ў сваіх вайсковых мэтах (асабліва, калі гэтыя караблі рэгулярна заходзяць ва ўнутраныя воды Тайваня).
Нагадаем, што ў пачатку красавіка з'явіліся звесткі аб маштабнай уцечцы ў інтэрнэт сакрэтных дакументаў ЗША, сярод якіх ёсць справаздача, прысвечаная Беларусі.
Меркаваны вінаваты ў гэтых злівах ужо арыштаваны амерыканскімі ўладамі.
Цяпер чытаюць
З праекта будаўніцтва мінскага метро выкінулі яшчэ дзве станцыі — «Кіеўскі сквер» і «Політэхнічную»7
Каментары