Для гэтай азіяцкай краіны вельмі важны вопыт украінскага супраціву. Вось чаму
Тайвань знаходзіцца на іншым краю свету, але гэта не перашкаджае мясцовым жыхарам вельмі пільна сачыць за вайной ва Украіне. Гэтая бітва маладой дэмакратыі супраць аўтакратычнага суседа, які пагражае самому праву нацыі на самавызначэнне, некалі можа паўтарыцца і для Тайваня.
Сі Цзіньпін і Уладзімір Пуцін, аўтакратычныя кіраўнікі Кітая і Расіі, часам кажуць, што іх сяброўству няма межаў. Мала каго гэта пужае так, як Тайвань, бо мясцовыя жыхары ведаюць — Кітай марыць аб вяртанні Тайваня сабе. Дзве рэчы не даюць вялікаму суседу выканаць сваю мару: Тайванскі праліў шырынёй 180 кіламетраў і ваенная моц ЗША, піша Economist.
Тым не менш, Кітай хутка навучыцца пераадольваць згаданыя перашкоды, і некаторыя амерыканскія афіцэры нават мяркуюць, што напад на Тайвань можа здарыцца да канца дзесяцігоддзя.
Такі напад меў бы катастрафічныя наступствы, бо знішчыў бы адну з мацнейшых дэмакратычных краін у Азіі. У Тайвані вырабляюць самыя перадавыя ў свеце камп’ютарныя чыпы, таму напад Кітая выклікаў бы хаос у сусветнай эканоміцы, таксама ў выпадку паспяховага нападу армія Кітая атрымала б бесперашкодны доступ да адкрытага акіяна, што паставіла б пад пагрозу Японію і ўвесь рэгіён.
Каб прадухіліць гэта, Тайвань, ЗША і іх саюзнікі павінны ўлічваць урокі расійскага ўварвання ва Украіну. І вось самы важны з іх: пагроза рэальная, таму лепш рыхтавацца да яе зараз, чым пазней, падчас самога бою.
Украіна паказала, што і большага ворага можна трымаць у страху, калі маеш адважнае кіраўніцтва, моцны баявы дух, гатовае да супраціву насельніцтва і заходнія ўзбраенні. І чым лепш Тайвань падрыхтуецца, тым менш імавернасць таго, што Кітай рызыкне ўварвацца ў гэтую краіну.
Добра, што ў Тайваня ўжо ёсць надзейная ваенная дактрына. Гэта так званая стратэгія дзікабраза, заснаваная на паўсюдным мабільным і схаваным узбраенні, прызначаным для абароны, сярод якога ёсць супрацькарабельныя і супрацьпаветраныя ракеты. Выкананне гэтай стратэгіі азначала б адмову ад некаторых дарагіх самалётаў, ракет і падлодак, якія зараз шукае Тайвань, але такія аб’екты ўсё роўна, хутчэй за ўсё, былі б узарваныя пры пачатку баявых дзеянняў.
Падрыхтоўка тым больш важная, што Тайвань — гэта востраў, адпаведна там больш цяжка папаўняць запасы. Невядома, як хутка ЗША здолелі б дапамагчы краіне падчас вайны, таму магчымасць пратрымацца павінна быць галоўным прыярытэтам. Паглядзім на Украіну: чым даўжэй яна ваюе, тым больш дапамогі атрымлівае.
Верагодна, ЗША маглі б дапамагчы Тайваню: дасылаць туды больш зброі, займацца падрыхтоўкай мясцовай арміі і сумеснымі вучэннямі з ёй, пашыраць кантакты з палітыкамі і афіцэрамі Тайваня. Усё гэта прывядзе Кітай у лютасць, таму ад Байдэна патрабуецца асаблівая асцярожнасць. Лепей за ўсё, калі ЗША будзе дапамагаць Тайваню абараняцца, але не будзе адкрыта казаць, што ўступіць у вайну з Кітаем, калі той уварвецца.
«Нашу Ніву» фінансуюць яе чытачы — падтрымаць проста
Чытайце таксама:
Пентагон: Магчымасць канфлікту паміж вялікімі дзяржавамі расце, а не памяншаецца. Вайна ва Украіне — на гады
-
«Змагацца за сваё жыццё кожны чортаў дзень». Амерыканскі рэпер вагой 220 кг выйшаў на сцэну з кіслародным балонам ФОТЫ
-
«У Грузіі няма зацэментаванай аўтарытарнай дзяржавы з жорсткай вертыкаллю». Беларус расказаў, у чым спецыфіка грузінскіх пратэстаў
-
Па дамоўленасці з сірыйскімі паўстанцамі байцы курдскіх Сірыйскіх дэмакратычных сілаў пакінулі раён Алепа
Каментары