Правіла дзейнічае 10 сезонаў запар.
Сёння ў Стамбуле пройдзе фінал футбольнай Лігі чэмпіёнаў. Згуляюць «Манчэстэр Сіці» і міланскі «Інтэр». Італьянскі клуб тройчы перамагаў у Лізе чэмпіёнаў (Кубку еўрапейскіх чэмпіёнаў) — у 1964, 1965 і 2010 гадах. «МанСіці» ні разу не браў гэтага еўрапейскага трафея, толькі ў 2021 годзе дайшоў да фіналу, дзе прайграў «Чэлсі».
Вядомы факт: апошнія 10 сезонаў запар галоўны клубны трафей бярэ каманда, у якой ёсць харват:
2013-ы — Марыа Манджукіч («Баварыя»),
2014-ы — Лука Модрыч («Рэал»),
2015-ы — Іван Ракіціч («Барселона»),
2016-ы — Лука Модрыч і Матэа Ковачыч («Рэал»),
2017-ы — Лука Модрыч і Матэа Ковачыч («Рэал»),
2018-ы — Лука Модрыч і Матэа Ковачыч («Рэал»),
2019-ы — Дэян Лоўрэн («Ліверпуль»),
2020-ы — Іван Перышыч («Баварыя»),
2021-ы — Матэа Ковачыч («Чэлсі»),
2022-і — Лука Модрыч («Рэал»).
У васьмі фіналах з дзесяці ў каманды, якая прайграла, не было харватаў у складзе — вынік быў прадвызначаны. У матчы 2017 года ў «Ювентуса» быў Манджукіч, у 2018-м у «Ліверпуля» — Лоўрэн, але ў «Рэала» было ў складзе два харваты.
А што зараз?
За «Інтэр» гуляе Марцэла Брозавіч. З «МанСіці» складаней. Цяпер у складзе каманды харватаў няма.
Але ўчора з'явілася інфармацыя, што клуб купляе ў «Чэлсі» таго самага Матэа Ковачыча, які будзе выступаць за «Сіці» з наступнага года.
Таму, як быць? Лічыць, што ў англійскай камандзе ёсць харват ці не?
Хто пераможа?
Пабачым вечарам. Пачатак гульні ў 22:00.
Цэнтральную ролю ў арганізацыі перамоваў з амерыканцамі адыграў муж Наталлі Пяткевіч. Чаму ён?16
Каментары