Кіраўніцтва Польшчы перакананае, што на меркаваным рэферэндуме палякі не толькі падтрымаюць будаўніцтва сцяны на мяжы з Беларуссю, але і выступяць за распаўсюджанне гэтай практыкі на мяжу з Калінінградскай вобласцю Расіі, паведамляе Польскае радыё.
Будаўніцтва агароджы на польска-беларускай мяжы вельмі важнае, асабліва ў цяперашняй палітычнай сітуацыі, паколькі гэта пытанне бяспекі не толькі Польшчы, але і ўсёй Еўропы. Плот на мяжы абараняе ад наплыву нелегальных мігрантаў, а цяпер таксама наймітаў з ПВК «Вагнер». Гэта сцвярджаў міністр адукацыі Польшчы Пшэмыслаў Чарнэк, прадстаўляючы ў Сейме абгрунтаванне ўрадавай прапановы аб правядзенні агульнанацыянальнага рэферэндуму па гэтым пытанні.
Больш за тое, палітык ад кіроўнай партыі «Права і справядлівасць» выказваў перакананне, што палякі на рэферэндуме падтрымаюць ідэю працягваць будаўніцтва сцяны далей:
«Таму палякі адкажуць: Працягваем будаваць! Ідэнтычную агароджу мы пабудуем таксама на мяжы з Расіяй, то-бок з Калінінградскай вобласцю. Мы будзем абараняць бяспеку польскай дзяржавы».
Пытанне, па якім польскае кіраўніцтва прапануе выказацца грамадзянам на рэферэндуме, гучыць так: «Ці падтрымліваеце вы ліквідацыю агароджы на мяжы паміж Рэспублікай Польшча і Рэспублікай Беларусь?»
Рэферэндум плануецца правесці разам з парламенцкімі выбарамі, то-бок 15 кастрычніка.
Цяпер чытаюць
У дзень пачатку Пецярбургскага эканамічнага форуму УСУ нанеслі дзясятак удараў па нафтавым тэрмінале ў порце горада і базе Балтфлота ў Кранштаце32
Каментары