Мінскага менеджара-эканаміста асудзілі да двух гадоў калоніі за ўдзел у акцыі пратэсту і нібыта за «траву»
Юрыя Дабрахотава затрымалі 20 красавіка па падазрэнні ў «дробным хуліганстве», але абвінавачанне выставілі за ўдзел у акцыі пратэсту ў 2020 годзе.
Суд Фрунзенскага раёна асудзіў 35-гадовага Юрыя Дабрахотава па «народным артыкуле» (ч.1, арт. 342, актыўны ўдзел у групавых дзеяннях, якія груба парушаюць грамадскі парадак), а таксама за выраб, набыццё і захоўванне наркатычных рэчываў (ч. 1 арт. 328 КК). «Наркатычны» артыкул першапачаткова ў справе не фігураваў, і з’явіўся толькі падчас судовага пасяджэння, піша «Вясна».
Справу разглядала суддзя Юлія Крэпская.
Юрыя затрымалі 20 красавіка па падазрэнні ў «дробным хуліганстве», але абвінавачанне выставілі за ўдзел у акцыі пратэсту ў 2020 годзе. Пасля ператрусу, праведзенага па месцы жыхарства, у кватэры знайшлі слоік з невялікай колькасцю марыхуаны.
Падчас суду Дабрахотаў не прызнаў віны па двух складах злачынства.
Ён патлумачыў, што ў верасні 2020 года пасля працы ўбачыў шмат людзей, якія накіроўваліся ў бок праспекта Пераможцаў і далучыўся да іх. А наконт захоўвання наркатычных рэчываў, ён паведаміў, што слоік з «травой» і іншымі рэчамі пакінуў у кватэры папярэдні жыхар».
Пра затрыманні Юрыя збівалі супрацоўнікі міліцыі. «Каля 9 гадзін раніцы я адчуў грукат, адкрыў уваходныя дзверы. Там знаходзіліся нейкія людзі ў масках. Не ведаў, ці былі гэта супрацоўнікі міліцыі, бо яны нічога не растлумачылі, і адразу паклалі тварам на падлогу. Не разумеў, што адбываецца».
Пасля гэтага яму нешта казалі, але ў сувязі з праблемамі са слыхам і шокам, сэнс слоў не разумеў. Таксама яго білі, пакуль не паведаміў паролі ад усіх тэлефонаў.
У выніку Дабрахотава прызналі вінаватым па пералічаных вышэй артыкулах і асудзілі сукупна да двух гадоў калоніі.
Грошы, арыштаваныя пад час ператрусу: 2 000 даляраў, 450 еўра, 50 рублёў, пакінутыя пад арыштам, а аўтамабіль «Фальксваген мультывен» быў вернуты гаспадару.
Каментары