У Германіі выдалі аўдыякнігу «Зэкамерон» Максіма Знака па-нямецку
Перад сёлетнімі Калядамі Евангелічная царква Германіі нагадала людзям пра лёс больш за паўтары тысячы палітвязняў, якія нявінна знаходзяцца ў турмах Беларусі. Гэтым разам Царква спрычынілася да выхаду аўдыёкнігі Максіма Знака «Зэкамерон» у перакладзе на нямецкую мову, якую начытаў акцёр Б’ярнэ Мэдэль.
Петра Босэ-Хубер, віцэ-прэзідэнтка царкоўнага кіраўніцтва і замежная епіскапіня ЕЦГ, падкрэсліла важнасць аўдыёкнігі:
«Максім Знак з’яўляецца адным з каля паўтары тысячы палітзняволеных у Беларусі, усе з якіх бязвінна асуджаныя проста таму, што яны выступілі ў абарону свабоды, дэмакратыі і чалавечай годнасці. Як і шматлікія іншыя вядомыя палітвязні, Максім Знак знаходзіцца ў адзіночнай камеры. З пачатку года няма звестак пра ягонае жыццё.
Ніхто не ведае, што з ім адбываецца зараз — застаецца толькі спадзявацца і маліцца, што ён жывы. Тым больш важна, што ягоныя запісы змаглі трапіць да нас з турмы — і праз гэтую аўдыёкнігу мы можам пачуць яго пасланне на ўсё жыццё».
Максім Знак быў юрыстам штаба прэтэндэнта ў прэзідэнты Віктара Бабарыкі. Яго затрымалі 9 верасня 2020 года ў штабе каманды Бабарыкі і праз год разам з Марыяй Калеснікавай абвінавацілі ў спробе захопу ўлады, публічных закліках да дзеянняў, скіраваных на прычыненне шкоды нацыянальнай бяспецы, і стварэнні экстрэмісцкага фармавання — суддзя Сяргей Епіхаў асудзіў Максіма да 10 гадоў калоніі.
З лютага 2023 года Максім цалкам пазбаўлены сувязі са знешнім светам: улады не дапускаюць да яго адвакатаў, пазбавілі яго тэлефонных званкоў, спатканняў і ліставання нават з сямейнікамі.
Усе аргументы аб неабходнасці забяспечваць правы Знака ўладамі праігнараваныя, а скаргі — адхіленыя. Усіх адвакатаў, якія баранілі Максіма, пазбавілі права працаваць.
Цяпер чытаюць
Сустрэчу Рыжанкова з Сікорскім папрасіў Мінск. Што каманда Ціханоўскай абмяркоўвала з палякамі да і пасля яе7
Каментары