«Буду супраціўляцца, колькі змагу». У трэнера Свена-Ёрана Эрыксана дыягнаставалі тэрмінальны рак
Эрыксану — 75 гадоў. Паводле яго слоў, магчыма, яму засталося зусім мала часу, але ён стараецца пра гэта не думаць.
Былы трэнер зборнай Англіі па футболе Свен-Ёран Эрыксан прызнаўся, што каля года таму яму дыягнаставалі неаперабельны рак мозга, і цяпер дактары прагназуюць для яго яшчэ ад сілы год жыцця, піша Бі-бі-сі.
У сувязі з гэтым ён заявіў, што пастараецца зрабіць так, каб гэты год стаў найлепшым з усіх пражытых.
Эрыксану — 75 гадоў. Паводле яго слоў, магчыма, яму засталося яшчэ менш часу, але ён стараецца пра гэта не думаць.
«Я буду супраціўляцца столькі, колькі змагу», — сказаў Эрыксан шведскаму радыё P1.
Свен-Ёран Эрыксан пачаў кар'еру футбольнага трэнера ў 1976 годзе ў сябе на радзіме, узначаліўшы спачатку шведскі клуб «Дэгерфорс», а затым «Гётэборг».
З 1982 года ён працаваў з рознымі замежнымі клубамі, уключаючы такіх грандаў, як партугальская «Бенфіка», італьянская «Рома», англійскія «Манчэстэр Сіці» і «Лестэр Сіці» і многія іншыя.
Узначальваў зборныя Англіі, Мексікі, Кот-Д'Івуара і Філіпін.
Даўжэй за ўсё ён прабыў галоўным трэнерам англійскай зборнай — з 2001 па 2006 гг.
Шведскі спецыяліст стаў першым замежным трэнерам зборнай Англіі. Ён заняў сваю пасаду ў 2001 годзе і ўжо ў 2002-м вывеў сваю каманду ў чвэрцьфінал чэмпіянату свету.
Пад яго кіраўніцтвам англічане таксама выходзілі ў чвэрцьфіналы чэмпіянату Еўропы-2004 і ЧС-2006.
Агулам ён кіраваў рознымі футбольнымі клубамі цягам 47 гадоў.
Яго апошнімі падапечнымі сталі футбалісты шведскага клуба «Карлстад», з якімі ён развітаўся 11 месяцаў таму, калі яму паставілі дыягназ.
Цяпер Свен-Ёран жыве ў хоспісе, але, паводле яго, вядзе абсалютна нармальны лад жыцця: наведвае сваіх блізкіх, а яны — яго. Ён шмат кантактуе з іншымі пацыентамі і займаецца спортам, хоць значна менш, чым нават год таму.
«Калі табе абвяшчаюць такі дыягназ, раптам пачынаеш шанаваць кожны дзень і шчаслівы ўжо ад таго, што прачнуўся раніцай і адчуваеш сябе добра», — кажа Эрыксан.
Пра тое, што ён хворы, высветлілася, калі дзеці адвезлі яго ў бальніцу з мікраінсультам.
Абследаванне паказала, што на той момант ён перанёс ужо пяць мікраінсультаў і ўсе яны не мелі сур'ёзных наступстваў. Тады ж дактары ўбачылі пухліну.
«Мне сказалі, што прызначаць лячэнне, каб максімальна падоўжыць маё жыццё. Але дыягназ канчатковы, і аперацыя, на жаль, немагчымая», — кажа Эрыксан.
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч18
Каментары