У Беларусі ўпершыню правялі конкурс сярод аддзелаў прымусовага выканання
Журы ацэньвала працу аддзелаў прымусовага выканання па спецыяльна распрацаванай шкале. Балы выстаўляліся за эфектыўнасць вышуку даўжнікоў, за забеспячэнне выканання судовых рашэнняў, работу са зваротамі грамадзян — усяго 16 крытэрыяў. Такі конкурс у Беларусі правялі ўпершыню, піша «Белка».
Сярод іншага, распавёў начальнік раённага АПВ Аляксей Матарас, улічвалася агульная нагрузка на падраздзяленне.
У аддзеле Савецкага раёна Гомеля, паводле яго, працуюць 14 судовых выканаўцаў. У сярэднім за кожным замацавана па 1700 выканаўчых вытворчасцяў. Яны ў мінулым годзе прымусова спагналі з гамельчукоў 8,4 млн рублёў.
Таксама, дадае «Белка», мела значэнне работа з грамадзянамі, якія не могуць выплачваць даўгі. «У такіх выпадках выканаўцы падбіралі альтэрнатыўны спосаб выканання абавязацельстваў — грамадскія працы або кароткатэрміновае зняволенне ў месцы пазбаўлення волі», — тлумачыць выданне.
«Упартая праца ў 2023 годзе прынесла аддзелу прымусовага выканання Савецкага раёна Гомеля перамогу ў камандным заліку», — піша «Белка».
Каментары