У Мінску з'явяцца аўтаматы, у якіх можна будзе набыць балоны са звадкаваным газам, паведаміла прэс-служба Мінэнерга. Аўтаматы вырабляе РУП «Белгазтэхніка».
«Плануецца, што першы газамат, або аўтаматызаваную ўстаноўку для рэалізацыі балонаў са звадкаваным газам, адкрыюць у Мінску ўжо сёлета. З іх дапамогай спажыўцы змогуць мяняць пустыя балоны на новыя», — расказалі ў міністэрстве.
Гэта будзе пілотны праект, мэтай якога з'яўляецца вывучэнне попыту на новы від паслуг і вызначэнне аптымальных пляцовак для такіх аўтаматаў. Пакуль аўтаматы плануюць ставіць побач з АЗС, у буйных ГЦ і на рынках.
«Аўтаматызаваная ўстаноўка складаецца з прылады прыёму і выдачы балонаў і сістэмы аплаты. З дапамогай электроннага табло карыстальнік зможа выбраць неабходны па аб'ёме балон і расплаціцца банкаўскай картай. Усе камплектуючыя і праграмнае забеспячэнне, якія тут выкарыстаныя, — беларускай вытворчасці», — адзначылі ў ведамстве.
Каментары