Рыгор Кастусёў у вершаваных радках пакінуў тэстамент на выпадак смерці ў турме
17 красавіка былому старшыні Партыі БНФ Рыгору Кастусёву споўнілася 67 гадоў. Ужо чацверты дзень нараджэння асуджаны на 10 гадоў палітвязень сустракае за кратамі.
Арыштавалі яго тры гады таму, у Дзень касманаўтыкі 12 красавіка. У лістах сваякам палітвязень часта згадвае гэтае супадзенне, не абмінуў ён увагай сумную для сябе падзею і ў нядаўнім пасланні, піша Радыё Свабода.
«Хутка будзе тры гады з таго дня касманаўтыкі… Тры гады. За гэты час пастарэў на тры гады і ўсе не магу прывыкнуць да гэтай пары да свайго выгляду, калі гляджуся ў люстэрка. Не магу ўсвядоміць, што здарылася ў плане здароўя».
У зняволенні, яшчэ ў СІЗА на вуліцы Валадарскага, Рыгор Кастусёў захварэў на анкалогію. Некалькі разоў яму ладзілі абследаванні, прызначалі лячэнне, але аблягчэння ўмоваў утрымання палітык не дачакаўся.
З ПК-22 у Івацэвічах, дзе адбываў пакаранне Кастусёў, у пачатку гэтага года яго перавялі ў крытую турму Гродна.
У пачатку красавіка сваякам палітвязня стала вядома, што яму зрабілі аперацыю — вывелі катэтэр з мачавога пухіта. Паводле зяця палітыка Дзмітрыя Антончыка, аперацыя зняла небяспеку разрыву пухіра, але ўскладніла знаходжанне ў вязніцы.
«Адразу пасля аперацыі Рыгора Кастусёва вярнулі ў камеру», — расказаў ягоны зяць. У апошніх лістах з няволі Рыгор Кастусёў напісаў пра стан здароўя.
«Яму рабілі аналіз крыві, дык паказнікі дрэнныя: у два разы павышаны бялок у крыві. Павялічаныя лімфавузлы. Таксама турбуе варыкоз на нагах. Але ён не любіць пра гэта шмат паведамляць і думаць. Затое працягвае пісаць вершы. Вось прыслаў верш, прысвечаны сваёй роднай вёсцы Цяхцін у Бялыніцкім раёне», — падзяліўся Дзмітрый Антончык і працытаваў верш Кастусёва, які той прыслаў з турмы.
Не забываю тых мясцін,
Што мне даюць натхненне, сілы,
Пад рэдкай назваю Цяхцін,
Ад нараджэння родны, мілы…
У апошніх радках верша Рыгор Кастусёў фактычна пакідае тэстамент на выпадак смерці ў вязніцы.
…Пад шэры камень. Толькі той,
Што ўзяты з родных мне мясцінаў.
І невялікаю плітой,
Дзе бачна, хто каго пакінуў.
12 красавіка 2021 года Рыгора Кастусёва затрымалі супрацоўнікі КДБ у яго дома ў Шклове, а таксама Аляксандра Фядуту і Юрыя Зянковіча, затым іх абвінавацілі ў спробе змову наконт перавароту ў Беларусі. У верасні 2022 года суд прызнаў Кастусёва вінаватым у «змове з мэтай захопу ўлады» і асудзіў на 10 гадоў. Беларускія праваабаронцы прызналі Рыгора Кастусёва палітычным вязьнем.
«Пражыць 6 гадоў выглядае складанай задачай». Рыгор Кастусёў даслаў ліст з-за кратаў
«Калі выпадкова натрапіць на люстэрка, не можа паверыць, што яго давяло да такога стану» — зяць пра зняволенага Рыгора Кастусёва
Рыгору Кастусёву ў турме зрабілі аперацыю
У Рыгора Кастусёва са здароўем усё кепска
Адсутнасць ныркі, пухліна ў галаве, рак. Хто з беларускіх палітвязняў мае за кратамі вялікія праблемы са здароўем
Беларусы горача спрачаюцца, ці варта прывязваць дапамогу на дзіця да заробку маці51
Беларусы горача спрачаюцца, ці варта прывязваць дапамогу на дзіця да заробку маці
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1313
Каментары