Падобна, украінцы знайшлі спосаб барацьбы з расійскай марской авіяцыяй
У чым сутнасць вынаходніцтва?
Пра тое, што ўкраінскія ваенныя знайшлі новы спосаб барацьбы з расійскай вайсковай авіяцыяй, напісаў расійскі тэлеграм-канал Fighterbomber.
Яго сутнасць заключаецца ва ўстаноўцы на безэкіпажныя катары (БЭК) ракет тыпу «паветра-паветра» Р-60/Р-70. Як пішуць расійскія паблікі, украінскія спецыялісты здолелі сумясціць сістэму тэлекіравання БЭК і ракеты. На кожны катар ставіцца па дзве ракеты, асаблівасць якіх у саманавядзенні. Ракеце не патрэбныя ніякія прыцэльныя сістэмы і лакатары.
Як паведамляецца, у ноч на 6 мая ў раёне паўночна-заходняга ўзбярэжжа Крыму было выяўлена адразу пяць надводных БЭК Magura V5. На адным з іх былі ўстаноўлены ракеты класа «паветра-паветра». Расійскі бок здолеў іх усе ліквідаваць, але адна ракета была запушчана.
Па меркаванні спецыялістаў, адзіным эфектыўным сродкам змагання з БЭКамі з'яўляецца пастаяннае патруляванне тэрыторыі верталётамі. І ў гэтым якраз і галоўны казус, бо менавіта на верталёты і палююць БЭКі.
Як мы пісалі раней, Magura V5 — марскі беспілотнік, які можа знаходзіцца ў аўтаномным рэжыме да 60 гадзін. Такім чынам ён можа ў дрэйфе чакаць з'яўлення цэлі, якой, акрамя верталётаў, могуць быць і самалёты.
Адзін з каментатараў пад навінаю напісаў: «З Бельбека (аэрапорт у Севастопалі — «НН») узлятаць у бок мора нельга і заходзіць на пасадку з мора нельга. … Падобная сітуацыя на ўсіх прыбярэжных аэрадромах».
«Траса ўзлёту праходзіць над горадам. Можна падлавіць борт на ўзлёце і грохнуць па ім. Борт гарантавана ўпадзе на горад, як не адводзь», — тлумачыць іншы.
Цяпер чытаюць
Адстаўны падпалкоўнік міліцыі адсудзіў кватэру ў сваёй дачкі. Гучная сямейная гісторыя з Брэста5
Каментары