Неўзабаве могуць сур'ёзна падаражэць кітайскія тавары. З чым гэта звязана?
Экспедыцыйныя кампаніі паведамілі, што 6 мая ў Кітаі рэзка выраслі цэны на адпраўку кантэйнераў у Расію і Беларусь па чыгунцы. Цана перавозкі ў сярэднім павялічылася на $500-800 за кантэйнер. У выніку гэтага прадукцыя з Кітая, тавараабарот з якім у Беларусі пастаянна расце, можа сур'ёзна падаражэць, піша Tochka.by.
«Рост цэн звязаны з памяншэннем колькасці вольных кантэйнераў у Кітаі, а таксама з вялікімі заторамі, якія ўзніклі на межах з Кітаем», — сказана ў паведамленні.
Яшчэ адной прычынай рэзкага падаражэння дастаўкі грузаў па чыгунцы праз Казахстан і Расію ў Беларусь магло стаць тое, што стаўкі марскога фрахту з Кітая ў Еўропу таксама падаражэлі. Тут, як і ў выпадку з чыгуначным спалучэннем, памер «надбаўкі» залежыць ад месца адпраўлення грузу.
У траўні, у параўнанні з красавіком, цана дастаўкі кантэйнера марскім шляхам павялічылася на $800-1500 (у залежнасці ад порта адпраўлення).
«Пры гэтым большасць вольных месцаў на суднах у траўні ўжо зарэзерваваная, і марскія лініі прапануюць вольныя месцы на суднах толькі на канец траўня — пачатак чэрвеня», — адзначаецца ў інфармацыі, прадстаўленай экспедыцыйнымі кампаніямі.
Верагодней за ўсё, кошт тавараў з Кітая для беларусаў вырасце на фоне гэтых навін, аднак дакладна сказаць пра такое пакуль складана.
Цяпер чытаюць
Замест вайны сланы ў новай кнізе Сашы Філіпенкі. І Масква4
Каментары