Дамы звычайных людзей пачынаюцца за 50 метраў ад склада боепрыпасаў, што катэгарычна забаронена. Затое бяспечную дыстанцыю на выпадак узрыву захаваў кіраўнік віцебскай вертыкалі са сваімі чыноўнікамі.
Склад боепрыпасаў пад самымі хатамі
Звесткі пра нядаўнія пажары на ўкраінскіх складах боепрыпасаў, з-за якіх быў амаль на суткі паралізаваны чыгуначны рух, прымусілі задумацца і жыхароў Віцебску. Нехта згадаў, што на гарадской ускраіне таксама ёсць сховішча зброі. І размешчана яно самым небяспечным чынам. Выбуховыя прыстасаванні агульнай вагой у некалькі соцень тон належаць 317-й асобнай гвардзейскай мабільнай брыгадзе. Але ж захоўваюцца яны дастаткова далёка ад месца дыслакацыі вайскоўцаў і небяспечна блізка ад мірных жыхароў – у вёсцы Уланавічы, якая цяпер уваходзіць у межы горада.
Мясцовыя жыхары маюць малапрыемнае суседства: адлегласць ад сховішча баявых снарадаў да бліжэйшае хаты складае не больш як 50 метраў. Між тым дзяржаўнымі дакументамі прадугледжаны зусім іншыя нормы: 18 студзеня 2000 года Савет міністраў прыняў пастанову, згодна з якой нават знешняя агароджа вакол вайсковых складоў мусіць знаходзіцца не менш як за тры кіламетры ад любых «цывільных» жылых пабудоў.
Больш таго: пастанова Саўміну забараняе будаўніцтва дамоў і правядзенне сельскагаспадарчых работ у гэтай трохкіламетровай зоне вакол вайсковых складоў. Але ў Віцебску, падобна, на тое патрабаванне не зважаюць: побач са сховішчам боепрыпасаў знаходзіцца прыватны сектар і некалькі пасёлкаў, забудаваных лецішчамі.
Затое на «законнай» адлегласці дом віцебскага мэра
Жыхары Віцебска, якія не хочуць жыць на «бочцы з порахам», напісалі зварот да старшыні гарвыканкаму Пятра Драздова, каб ён неяк паспрыяў вырашэнню сітуацыі. Нехта з аўтараў ліста падлічыў, што адлегласць ад складоў да рэзідэнцыі мэра якраз і складае належныя паводле закону тры кіламетры. А вось да цэнтру горада з больш як 320-тысячным насельніцтвам адлегласць меншая, так што ў выпадку пажару або выбуху чалавечых ахвяраў пазбегнуць наўрад ці ўдасца.
Вядома, што ва Ўланавічах захоўваюцца 60 умоўных вагонаў са зброяй. З якой менавіта – дакладна невядома, вайсковая таямніца... Наступствы верагодных трагічных выпадковасцей, паводле распараджэння мэра Віцебска Пятра Драздова, цяпер спрабуюць спрагназаваць у мясцовай управе Міністэрства надзвычайных сітуацый. Ад высноваў супрацоўнікаў МНС і будзе залежаць далейшы лёс небяспечнага суседства мірных жыхароў Віцебску і вайсковых складоў.
Алёна Штраль, Прыдзьвіньне № 5, жнівень
«Шынвізэ — кончаны садыст». Адзін з адыёзных начальнікаў калоніі Бабруйска перабраўся ў Германію28
Каментары