Сям'я гомельца, які загінуў паўтара года таму з-за вайсковага грузавіка, дамагаецца кампенсацыі ў судзе
У Гомельскім абласным судзе 9 ліпеня разглядаецца скарга на рашэнне суда Савецкага раёна па пазове да вайсковай часці аб кампенсацыі маральнай шкоды, заўважыў «Флагшток». Пазоўнікам пазначаны Віктар Каламіец — верагодна, гэта бацька Сяргея Каламійца, які загінуў у канцы 2022 года, урэзаўшыся ў вайсковы «ЗіЛ».
Позна ўвечары ў канцы 2022 года на трасе Гомель-Мінск 46-гадовы Сяргей на аўтамабілі «Івека» заехаў у «ЗіЛ», які спыніўся праз тэхнічную няспраўнасць. Ад атрыманых траўмаў кіроўца «Івека» памёр на месцы.
Сяргей не заўважыў, што ў паласе стаяў, мяркуючы па ўсім, без габарытных агнёў і святлоадбівальнікаў, вайсковы грузавік. Гэта транспартна-зараджальная машына на базе ЗіЛ-135ЛМ. Аўтамабіль прызначаны для транспартавання і загрузкі ракет у РСЗА «Ураган». У той перыяд Узброеныя Сілы Беларусі пераганялі тэхніку.
Фатаграфіі ДТЗ з вайсковай машынай першапачаткова размясціла УУС Гомельскага аблвыканкама, але ў хуткім часе выдаліла іх на сваёй старонцы і запатрабавала выдаліць у іншых гарадскіх пабліках.
Блізкія загінулага некалькі месяцаў праз сацсеткі спрабавалі знайсці сведак ДТЗ — яны спрабавалі даказаць, што грузавік Мінабароны не быў пазначаны аварыйнай сігналізацыяй.
У Сяргея засталося двое дзяцей, ён працаваў у транспартнай кампаніі, якая пазначаная ў пазове суадказчыкам. А галоўны адказчык — вайсковая часць 12147 у Асіповічах (51-я гвардзейская артылерыйская брыгада).
Пазоў аб кампенсацыі маральнай шкоды, які быў пададзены да вайсковай часці, верагодна, не быў задаволены альбо задаволены не ў поўнай меры, і сваякі Сяргея, праз паўтара года пасля яго смерці, працягваюць дамагацца свайго праз суд.
Яшчэ адным ускосным доказам таго, што ў судзе разглядаецца пазоў менавіта па той аварыі, можа служыць фота аўтапарка прадпрыемства «Гаранттрансбізнэс», якое праходзіць суадказчыкам па справе. На паркоўцы фірмы стаяць такія ж «Івека», як і тая, што трапіла ў ДТЗ, а на заднім плане прыкметны аўтамабіль з лагатыпам «Савушкін» — такі ж быў у аўто, з якім адбылася аварыя.
Супаў і нумар вайсковай часці, якая ў тыя дні перакідала тэхніку на Гомельшчыну. За некалькі дзён да аварыі на гэтай трасе фіксаваліся «Ураганы» Асіповіцкай артылерыйскай брыгады. Цяпер гэтая часць выступае адказчыкам.
Расійскі ваенпрам сур'ёзна завінаваціўся Беларусі. Не дапамагаюць нават суды
У цэнтры Гомеля зладзілі гонкі пад чырвона-зялёным сцягам, ДАІ пакуль не рэагуе
Матацыкл з гомельскімі нумарамі засвяціўся ў відэа з фронту ва Украіне — на ім ехаў расійскі вайсковец
Каля Рэчыцы цыстэрна з палівам рухнула з моста цераз Дняпро
Каментары