Siamja homielca, jaki zahinuŭ paŭtara hoda tamu z-za vajskovaha hruzavika, damahajecca kampiensacyi ŭ sudzie
U Homielskim abłasnym sudzie 9 lipienia razhladajecca skarha na rašeńnie suda Savieckaha rajona pa pazovie da vajskovaj čaści ab kampiensacyi maralnaj škody, zaŭvažyŭ «Fłahštok». Pazoŭnikam paznačany Viktar Kałamijec — vierahodna, heta baćka Siarhieja Kałamijca, jaki zahinuŭ u kancy 2022 hoda, urezaŭšysia ŭ vajskovy «ZiŁ».
Pozna ŭviečary ŭ kancy 2022 hoda na trasie Homiel-Minsk 46-hadovy Siarhiej na aŭtamabili «Ivieka» zajechaŭ u «ZiŁ», jaki spyniŭsia praz techničnuju niaspraŭnaść. Ad atrymanych traŭmaŭ kiroŭca «Ivieka» pamior na miescy.
Siarhiej nie zaŭvažyŭ, što ŭ pałasie stajaŭ, miarkujučy pa ŭsim, biez habarytnych ahnioŭ i śviatłoadbivalnikaŭ, vajskovy hruzavik. Heta transpartna-zaradžalnaja mašyna na bazie ZiŁ-135ŁM. Aŭtamabil pryznačany dla transpartavańnia i zahruzki rakiet u RSZA «Urahan». U toj pieryjad Uzbrojenyja Siły Biełarusi pierahaniali techniku.
Fatahrafii DTZ z vajskovaj mašynaj pieršapačatkova raźmiaściła UUS Homielskaha abłvykankama, ale ŭ chutkim časie vydaliła ich na svajoj staroncy i zapatrabavała vydalić u inšych haradskich pablikach.
Blizkija zahinułaha niekalki miesiacaŭ praz sacsietki sprabavali znajści śviedak DTZ — jany sprabavali dakazać, što hruzavik Minabarony nie byŭ paznačany avaryjnaj sihnalizacyjaj.
U Siarhieja zastałosia dvoje dziaciej, jon pracavaŭ u transpartnaj kampanii, jakaja paznačanaja ŭ pazovie suadkazčykam. A hałoŭny adkazčyk — vajskovaja čaść 12147 u Asipovičach (51-ja hvardziejskaja artyleryjskaja bryhada).
Pazoŭ ab kampiensacyi maralnaj škody, jaki byŭ padadzieny da vajskovaj čaści, vierahodna, nie byŭ zadavoleny albo zadavoleny nie ŭ poŭnaj miery, i svajaki Siarhieja, praz paŭtara hoda paśla jaho śmierci, praciahvajuć damahacca svajho praz sud.
Jašče adnym uskosnym dokazam taho, što ŭ sudzie razhladajecca pazoŭ mienavita pa toj avaryi, moža słužyć fota aŭtaparka pradpryjemstva «Haranttranśbiznes», jakoje prachodzić suadkazčykam pa spravie. Na parkoŭcy firmy stajać takija ž «Ivieka», jak i taja, što trapiła ŭ DTZ, a na zadnim płanie prykmietny aŭtamabil z łahatypam «Savuškin» — taki ž byŭ u aŭto, ź jakim adbyłasia avaryja.
Supaŭ i numar vajskovaj čaści, jakaja ŭ tyja dni pierakidała techniku na Homielščynu. Za niekalki dzion da avaryi na hetaj trasie fiksavalisia «Urahany» Asipovickaj artyleryjskaj bryhady. Ciapier hetaja čaść vystupaje adkazčykam.
Rasijski vajenpram surjozna zavinavaciŭsia Biełarusi. Nie dapamahajuć navat sudy
U centry Homiela zładzili honki pad čyrvona-zialonym ściaham, DAI pakul nie reahuje
Matacykł z homielskimi numarami zaśviaciŭsia ŭ videa z frontu va Ukrainie — na im jechaŭ rasijski vajskoviec
Kala Rečycy cysterna z palivam ruchnuła z mosta cieraz Dniapro
Kamientary