Каго прызналі найлепшымі скульптарамі Беларусі 2024 года? Вось як выглядаюць іх творы
Мікіта Моніч падрыхтаваў агляд прац, якія перамаглі на выставе «Арт-Мінск-2024».
![Федор Шурмелев «Минотавр». Fyodor Shurmelyov "Minotaur" Фёдар Шурмялёў "Мінатаўр"](http://nashaniva.com/img/w840d4webp1/photos/z_2024_07/-ri5r3.jpg.webp)
Сёлета на выставе «Арт-Мінск» было 450 твораў, што менш, чым у мінулыя гады. Дзясяткі мастакоў і скульптараў трапілі ў чорныя спісы, ім не дазваляюць выстаўляцца. А што было адметнага сярод тых, хто на выставе ўсё ж апынуўся? З пераможцамі глядацкага галасавання мастацтвазнаўца Мікіта Моніч знаёміць у новым выпуску свайго ютуб-канала.
Моніч звяртае ўвагу, што гледачы галасавалі не за творы, а за аўтараў, таму не заўсёды зразумела, што з прадстаўленых твораў канкрэтнага ўдзельніка выставы спадабалася больш.
Першым у спісе пераможцаў у намінацыі «Скульптура» знаходзіцца пастаянны ўдзельнік выстаў Фёдар Шурмялёў, які прэзентаваў сваю графіку і скульптуру.
«Творы Шурмялёва — гэта прастора для інтэрпрэтацыі», — адзначае мастацтвазнаўца і прыводзіць сваю інтэрпрэтацыю твора: «Гэта не сам звер, а ягоны шкілет, ажыўлены касцяк. Пэўна, ён уяўляе сабою паднятага з пасмерця монстра, ужо забітага героем. Але, відаць, не да канца. Цяжка ўстрымацца ад асацыяцый».
Наступным пераможцам стаў Аляксандр Шапо, які таксама практыкуе як у графіцы, так і ў манументальнай скульптуры. Моніч звяртае ўвагу на скульптуру «Хлопчык са Смілавіч» — гэта скульптурны партрэт мастака Хаіма Суціна, генія родам з Беларусі.
![Alexander Shapo "The Boy from Smolyavych" Александр Шаппо «Мальчик из Смолевича» Аляксандр Шапо "Хлопчык са Смалявічаў"](http://nashaniva.com/img/w732d4webp1/photos/z_2024_07/-11k7m.jpg.webp)
«Аўтар удала перанёс экспрэсію аўтапартрэта ў бронзу», — лічыць мастацтвазнаўца.
Трэцяе месца ў намінацыі «Скульптура» заняў Андрэй Беле, які нарадзіўся ў Мінску, але стала жыве ў Расіі. Акрамя скульптуры, мастак стварае партрэты і нацюрморты.
![Андрей Биле «Любительница хурмы» Andrey Biale "Persimmon Lover" Андрэй Бяле "Аматарка хурмы"](http://nashaniva.com/img/w732d4webp1/photos/z_2024_07/-dz5vp.jpg.webp)
Наступным у спісе найлепшых стаў Ян Басалыга, які належыць да трэцяга пакалення вялікай творчай дынастыі каранямі са Случчыны.
![Ян Басалыга «Чайник вина» "Yan Basalyga "Teapot of wine" Ян Басалыга "Чайнік віна"](http://nashaniva.com/img/w732d4webp1/photos/z_2024_07/-xkc3k.jpg.webp)
«У творах Яна Басалыгі стрыманы экспрэсіянізм, разважанні пра чалавечыя пачуцці і спалучэнне чалавечых твараў і рэчаў. Творы ў яго някідкія, але змястоўныя. І матэрыял ён бярэ сабе не такі эфектны, як папярэднія творцы. Замест амбіцыйнай важкай бронзы — кераміка», — дае сваю ацэнку Моніч.
Па словах мастацтвазнаўцы, вельмі кантраснай да твораў Басалыгі выглядае стылістыка пятага пераможцы. Ім стаў мастак Дзмітрый Чужакоў, які працуе пад псеўданімам DSNT 87.
![Дзмітрый Чужакоў Scull Cat 80 Dmitry Chuzhakov Дмитрий Чужаков](http://nashaniva.com/img/w732d4webp1/photos/z_2024_07/-xsar8.jpg.webp)
Як заўважае Моніч, Чужакоў пачынаў як вулічны мастак і аўтар графіці. Папярэдні досвед выліўся ў эксперыменты з абстракцыяй, арнаментальнасцю, светлавымі праекцыямі. Цяпер Чужакоў стварае пано і скульптуры, у якіх добра бачна захапленне мастака анімэ.
«Усе намінанты ствараюць кола творчай актыўнасці, назіраючы якое можна зразумець штосьці важнае аб стане нашага грамадства і краіны», — падводзіць вынікі Мікіта Моніч.
Улады так зачысцілі выставу «Арт-Мінск», што нават лукашэнкаўцам не падабаецца
«Прадуктовы гіперрэалізм — тое, за што галасуе большасць». Моніч пра мастацкія густы ў грамадстве
Нагаворы і стукацтва, паказная лаяльнасць, кватэрнікі і міжсабойчыкі. Апублікаваны вынікі апытанкі дзеячаў культуры ўнутры Беларусі
Яны малявалі Беларусь. Мікіта Моніч склаў пантэон беларускіх мастакоў ВІДЭА
Каментары