«Настальгія па няздзейсненай будучыні». Беларускі гурт Molchat Doma выпусціў новы альбом
«Belaya Polosa» (Белая паласа) гэта зборнік з дзесяці кампазіцый, якія зусім па-іншаму раскрываюць сусветна вядомы пост-панк гурт і яго ўдзельнікаў. Папярэдні іхні альбом выйшаў ажно чатыры гады таму.
Настальгія па няздзейсненай будучыні — так апісваюць творчасць гурта аўтары тэлеграм-канала «КЛІК», — а музыка ў новым альбоме іграе індустрыяльнымі гукамі нібы вялізны адладжаны механізм.
«Прыкладна так канструктывіст і прагрэсівіст уяўляў сабе музыку будучыні. Удары, воплескі, выбухі, чужародныя сінтэзатары — гэтым пазначалі прагрэс, мары пра светлы ідэальны свет.
Але Molchat Doma пайшлі далей і абгарнулі гэтыя звонкія і грубыя гукі машын і аналагавых сінтэзатараў летуценнымі і адчужанымі гітарамі і цяжкім вакалам Ягора Шкутко, ператварыўшы ўтопію, светлую і поўную надзеі, у вытанчаную тугу і цёмны рэйв.
Такое ўжо здаралася ў 80-х, калі Depeche Mode перавярнулі сінтэзатарныя мары гурта Kraftwerk на 180 градусаў.
Але як жа прыемна бачыць гэта праз 40 гадоў ізноў. Абноўленае, палепшанае і на найвышэйшым узроўні.
Гэта чароўная музыка адзіноты, якая абсалютна дакладна будзе граць на вялізных канцэртах і вечарынках, аб'ядноўваючы тысячы і мільёны людзей. Гэтак жа парадаксальна, як і настальгія па будучыні.
І недзе ўнутры пульсуе надзея, што свет зробіць поўны абарот вакол сваёй восі, і такой складанай, прадуманай і шматграннай музыкі стане толькі больш», — пішуць аўтара канала.
Музычны крытык Аляксандр Чарнуха дадае, што «Белая паласа» гэта новая старонка ў біяграфіі гурта. На яго думку, ад пашарпаных часам і саўнд-эфектамі папярэдніх альбомаў Molchat Doma пачалі рухацца ў бок дэталізаванага, празрыстага саўнда, у якім можна корпацца ў дэталях і працаваць з якаснымі рэферэнсамі.
У новым альбоме Чарнуха вылучае кампазіцыю «Черные цветы» з вельмі характэрнай гатычнай лірыкай, вельмі атмасферны інструментал «Безнадежный вальс» і вяртанне да каранёў у заключным трэку «Зимняя».
Цяпер чытаюць
Топавы перакладчык паехаў у Беларусь мяняць пашпарт — і сеў за данаты. «КДБ паглядзеў на суму і вырашыў, што ніхто ў здаровым розуме не можа выдаткаваць столькі ўласных грошай»1313
Каментары