«Няма ніякай надзеі, што дождж спыніцца». Цэнтральная Еўропа пайшла пад ваду
Праліўныя дажджы, выкліканыя штормам «Барыс», прывялі да катастрафічнай паводкі з чалавечымі ахвярамі. Падобныя штармы ў рэгіёне здараюцца раз на 50 гадоў, але цяпер будуць адбывацца часцей — усё праз імклівае пацяпленне клімату.
Аварыйныя службы краін умацоўваюць засцерагальныя збудаванні для барацьбы з паводкай. Ад вады пацярпелі тысячы дамоў. Пра гэта піша BBC.
Загінулыя ў Румыніі, Польшчы і Аўстрыі.
У Аўстрыі падчас аперацыі па выратаванні грамадзян ад паводкі загінуў адзін пажарны, піша Reuters. Ваколіцы Вены былі абвешчаны зонай бедства, мясцовыя ўлады кажуць пра «беспрэцэдэнтную экстрэмальную сітуацыю».
Адзін чалавек загінуў у выніку паводкі ў Польшчы, заявіў прэм'ер-міністр Дональд Туск у нядзелю.
Шторм «Барыс» прывёў да ахвяр і ў Румыніі. У суботу ўлады паведамілі, што чатыры чалавекі загінулі падчас паводкі ў паўднёва-ўсходнім рэгіёне Галац.
У Чэхіі праз паводку ў некаторых раёнах была аб'яўлена эвакуацыя. Каля 51 тысячы гаспадарак на поўначы краіны закранулі перабоі з электраэнергіяй, паведамляе чэшская энергетычная кампанія CEZ.
У Празе ўзведзены загароды ад паводак.
«Мы зноў сутыкаемся з наступствамі змены клімату, якія ўсё больш адбіваюцца на еўрапейскім кантыненце — з драматычнымі наступствамі», — заявіў у суботу прэзідэнт Румыніі Клаус Яханіс.
З-за змены клімату экстрэмальныя ападкі становяцца ўсё больш верагоднымі ў Еўропе — як і ў многіх іншых частках свету. Цяплейшая атмасфера можа ўтрымліваць больш вільгаці, што прыводзіць да мацнейшых дажджоў.
Эміль Драгамір, мэр вёскі Слабозіі-Канакі ў румынскім рэгіёне Галац, паведаміў, што затоплена 700 дамоў. «Гэта катастрофа эпічных маштабаў», — сказаў Драгамір.
У горадзе Глухалазы на паўднёвым захадзе Польшчы ўлады заявілі, што рака выйшла з берагоў і затапляе вуліцы. У нядзелю яны заклікалі жыхароў эвакуіравацца ў больш высокія месцы.
Жыхарка горада Зоф'я Аўсяка расказала, што ўсе ў горадзе напалоханыя і «няма ніякай надзеі на тое, што дождж спыніцца».
У Кракаве, другім па велічыні горадзе Польшчы, улады прапанавалі жыхарам мяшкі з пяском для абароны ад паводкі.
Выступаючы ў горадзе Клодзка недалёка ад мяжы з Чэхіяй, адным з найбольш пацярпелых ад паводкі, прэм'ер Туск сказаў, што больш за паўтары тысячы чалавек у гэтым раёне ўжо былі эвакуіраваны.
Ён заклікаў іншых жыхароў супрацоўнічаць з аварыйна-выратавальнымі службамі, калі тыя звяртаюцца да іх з просьбай пакінуць свае дамы. У гэтым раёне 17 тысяч чалавек засталіся без электрычнасці, сказаў Туск, недзе адсутнічае сігнал мабільнай сувязі і інтэрнэт.
Затапленні ў Чэхіі і Украіне
У Чэхіі ў суботу прарвала плаціну на поўдні краіны. Міністр навакольнага асяроддзя Пётр Хладзік заклікаў жыхароў найбольш пацярпелых раёнаў падрыхтавацца да таго, каб пакінуць свае дамы.
Па словах Хладзіка, зямля прамочаная вадой і дажджавая вада застаецца на паверхні, што павялічвае рызыку раптоўных паводак. Міністр таксама папярэдзіў, што дажджы ў Чэхіі чакаюцца да аўторка.
Прэм'ер-міністр Чэхіі Пётр Фіяла сказаў, што краіна рыхтуецца да «цяжкіх выхадных». Улады ўзводзяць засцерагальныя сцены з мяшкоў з пяском і металічных агародж.
Футбольныя матчы ў дзвюх вышэйшых лігах краіны, запланаваныя на гэтыя выхадныя, былі адменены.
Як паведамілі прадстаўнікі ўкраінскіх чыгунак «Укрзалізниця», у Польшчы і Чэхіі адмянілі шэраг цягнікоў ва Украіну з-за паводак. Цягнікі з Прагі да Чопа і Перамышля ўсё яшчэ знаходзяцца ў Чэхіі і не паспеюць на свае стыковачныя ўкраінскія рэйсы.
Пасажырам з Украіны, якія будуць ехаць у напрамку Прагі, раяць звязацца з чэшскім або польскім аператарам чыгункі і ўдакладніць расклад рэйсаў, а таксама на ўсялякі выпадак запланаваць начлег у горадзе стыкоўкі.
Раніцай у Адэсе выпала амаль паўмесячная норма ападкаў — 19 мм, паведаміў мэр горада Генадзь Труханаў. У горадзе падтоплены некалькі вуліц, па якіх спынены рух. На вуліцах горада дзяжураць 48 адзінак тэхнікі і 95 супрацоўнікаў дарожных служб.
Чаму шторм аказаўся такім разбуральным
Шторм «Барыс» ужо прынёс вялікую колькасць ападкаў у Цэнтральную і Усходнюю Еўропу. Па прагнозах праліўныя дажджы будуць працягвацца як мінімум да канца панядзелка.
Больш за ўсё ападкаў выпала ў Чэхіі. У гарах на захадзе краіны з чацвярга выпала 288 мм ападкаў. Гэта прыкладна трохмесячная норма ападкаў усяго за тры дні.
Шторм аказаўся такім разбуральным па двух прычынах.
Па-першае, у сілу свайго становішча шторм прыцягвае халаднейшае паветра з поўначы, якое змешваецца з вільгаццю, якая паступае з незвычайна цёплых вод Міжземнага і Чорнага мораў.
Па-другое, над гэтымі ж раёнамі вельмі павольна перамяшчаецца вобласць нізкага ціску, і шторм аказаўся заціснутым паміж абласцямі высокага ціску на захадзе і ўсходзе.
Міністэрства аховы навакольнага асяроддзя Чэхіі заявіла, што штармы, падобныя да «Барыса», адбываюцца раз у 50 гадоў.
Пасля экстрэмальнай паводкі ў 2021 годзе ў Еўропе Сусветная сетка прагназавання надвор'я прыйшла да высновы, што верагоднасць і інтэнсіўнасць паводак такога тыпу ў Еўропе ўзрастае з-за хуткага пацяплення клімату.
Памятаеце правакатара і даносчыка Яўгена Какойта? Ён цяпер таксама палітвязень3
Каментары
На ровары паселі
. Хутка
Кузуркі
Жэрці
Пачынайце.
Сартуйце лепей сьмецьце
. І дакладней!
А досыць спажываць!
Хадзіце пешшу, ваш ровар - непрымальная раскоша!
Кузуркі ўсе пакутуюць праз вас!
Жарыце сена!
Майно здаем хутчэй ў калгас, яно ня трэба!
Плянэта гіне!