Унікальны выпадак: вызваленага па амністыі вярнулі ў калонію. Гэтага дамагліся бацькі ахвяры
Кіроўца, які збіў на пешаходным пераходзе дзіця ў Магілёве і праз паўгода выйшаў па амністыі, зноў знаходзіцца ў калоніі. Пра гэта паведамілі ў сацсетках бацькі хлопчыка.
У студзені 2024 года 61-гадовы жыхар Магілёва Віталь Кілеса насмерць збіў 10-гадовага хлопчыка. Той пераходзіў дарогу па пешаходным пераходзе, святлафор не працаваў. Аўтамабілі павінны былі прапусціць хлопчыка, але нармальнага асвятлення не было, кіроўцы не заўважалі яго. Адна машына праехала проста перад ім, а другая збіла насмерць школьніка.
Як высветлілася, кіроўца — той самы Кілеса — перавышаў хуткасць. Ён прызнаў віну, тлумачыў, што не заўважыў хлопчыка. Паколькі Кілеса быў цвярозы, у красавіку 2024 года яму прысудзілі пяць гадоў калоніі-пасялення (калі б быў п'яны, была б звычайная калонія).
У жніўні 2024 года бацькі загінулага хлопчыка даведаліся, што Кілеса выйшаў на свабоду па амністыі, хоць правёў за кратамі паўгода. Яны былі абураныя, што Кілесу адпусцілі так рана. Бацькі хлопчыка напісалі відэазварот, які шырока разышоўся па тыктоку і сабраў больш за 330 тысяч лайкаў. Таксама бацькі схадзілі на асабісты прыём да генеральнага пракурора Андрэя Шведа.
Прычынай вызвалення кіроўцы сталі яго праблемы са здароўем — тое, што раней ён праходзіў лячэнне ў сувязі з анкалогіяй.
Цяпер камісія з медыкаў пераглядзела ягоны дыягназ. І было вырашана вярнуць яго ў калонію-пасяленне — са сваім дыягназам ён можа адбываць пакаранне.
Хто тая жанчына, якую Марзалюк у эфіры БТ абазваў «шваллю з Гродна», і што яна піша ў чатах? Расказваем пра доктарку Стэфановіч24
Каментары