Трэнеру брэсцкага «Дынама» стала кепска пасля перамогі над БАТЭ — яму тэрмінова зрабілі аперацыю на сэрцы
Сяргей Кавальчук адчуў сябе няважна пасля перамогі ў матчы чэмпіянату Беларусі. Цяпер яму трэба будзе доўгае аднаўленне.
Выконваючы абавязкі галоўнага трэнера брэсцкага «Дынама» Сяргей Кавальчук трапіў у бальніцу пасля перамогі над БАТЭ ў чэмпіянаце Беларусі.
Гульня прайшла 9 лістапада і завяршылася з лікам 2:0 на карысць брэстаўчан. Па даных Football.by, неўзабаве пасля матча Кавальчуку стала дрэнна. Яго шпіталізавалі ў рэанімацыю і правялі аперацыю на сэрцы.
Як піша «Трыбуна», у Кавальчука здарыўся інфаркт. Пры гэтым дыягназ пакуль не пацверджаны. Вядома, што трэнер ужо меў адзін інфаркт некалькі гадоў таму.
Цяпер Кавальчуку трэба правесці некалькі месяцаў у бальніцы, яго чакае доўгае аднаўленне.
Сяргей Кавальчук — знакавая асоба для брэсцкага «Дынама». Ён выступаў за каманду ў якасці футбаліста, потым застаўся ў структуры трэнерам. Упершыню Кавальчук узначаліў «Дынама» ў 2004 годзе, з таго часу ён сыходзіў і вяртаўся на пасаду пяць разоў. Кавальчука клікалі ў каманду ў самыя крызісныя моманты пасля трэнерскіх адставак, і яго сталі называць ці не галоўным выратавальнікам у чэмпіянаце Беларусі.
Кавальчук перажыў з Брэстам розныя часы. Былі і галодныя: спачатку ў клубе настолькі не было грошай, што трэнер не мог сабе дазволіць нават новыя джынсы, а з ежай дапамагала цешча.
У канцы 2010-х клуб перайшоў пад кантроль блізкага да Лукашэнкі бізнэсоўца Аляксандра Зайцава, грошай раптоўна стала шмат. Кавальчук тады быў прызначаны спартыўным дырэктарам, і пры ім брэсцкае «Дынама» заваявала ў сезоне-2019 сваё адзінае чэмпіёнства. На святочную вечарынку да каманды тады прыехаў асабіста Віктар Лукашэнка.
У 2021-м Зайцаў пакінуў клуб, той ізноў перайшоў на баланс аблвыканкама. Пасля гэтага Кавальчук папрацаваў трэнерам у дублі, потым сышоў. Каб ізноў, ужо шосты раз, вярнуцца на масток у кастрычніку 2024-га — пасля чарговай трэнерскай адстаўкі.
Брэсцкае «Дынама» за два туры да канца чэмпіянату Беларусі ідзе на чацвёртым месцы. Падняцца вышэй яно ўжо дакладна не зможа.
Цяпер чытаюць
65‑гадовага гамельчука асудзілі за спробу дыверсіі на чыгунцы і здраду дзяржаве. Што вядома?4
Каментары