Падпісант ліста з крытыкай Борыс, Польшчы: Напружанасць з палякамі нагнятаецца звонку
Кандыдат медыцынскіх навук, галоўны доктар ГТМА Бярозаўскага раёна Іосіф Дзежыц быў сярод тых грамадзян Беларусі польскай нацыянальнасці, хто падпісаў зварот да кіраўніцтва Польшчы.
Кандыдат медыцынскіх навук, галоўны ўрач ГТМА Бярозаўскага раёна Іосіф Дзежыц быў сярод тых грамадзян Беларусі польскай нацыянальнасці, хто падпісаў зварот да кіраўніцтва Польшчы.
У лісце падпісанты адзначаюць, што «беларуская дзяржава ніколі не парушала і не парушае правоў грамадзянаў». А «Борыс і яе невялікае атачэнне не ўпаўнаважаны рэпрэзэнтаваць інтарэсы польскай меншасці», «яны дыскрэдытавалі сябе парушэннем законаў нашай дзяржавы».
«Наша Ніва»: Іосіф Адольфавіч, можна задаць некалькі пытанняў адносна падпісанага Вамі звароту да кіраўніцтва Польшчы?Іосіф Дзежыц: Я нічога не падпісваў.
«НН»: Ну як жа? А зварот грамадзянаў Беларусі польскай нацыянальнасці?
ІД: А, ну гэты падпісваў.
«НН»: А што падштурхнула да гэтага?
ІД: Ну гэта маё ўласнае меркаванне. Я не збіраюся ісці наперакор сумленню. У Беларусі насамрэч створаны ўсе ўмовы для развіцця нацыянальных меншасцяў. Усялякія спробы падзяліць палякаў на «нашых» і «нянашых» наканаваныя на правал. А то цяпер гэтая сітуацыя нагадвае вывяржэнне вулкана.
«НН»: А хто выходзіў на Вас з такой ініцыятывай?
ІД: Ніхто.
«НН»: Вы ў Саюзе палякаў, якім кіруе Станіслаў Сямашка?ІД: Так. Узначальваю бярозаўскую суполку. Яна налічвае 43 чалавекі. Уваходжу ў склад кіраўніцтва Саюза. Сядзеў у прэзідыуме падчас з’езду. Мяне сябры па тэлевізары бачылі.
«НН»: А якія мерапрыемстве ладзіце?
ІД: Зборы, паездкі людзей у Польшчу. Вось апошнім часам у Гайнаўку ездзілі.
«НН»: А польскі бок дапамагае?
ІД: Якое дапамагае? Вось праходзіў наш з’езд у Гродна. Былі прадстаўнікі ад міністэрства, абласцей. А вось з польскага пасольства нікога не было.
«НН»: А кажуць жа, што існуюць «чорныя спісы» для сяброў афіцыйнага СПБ.
ІД: Так, ёсць такое. Але супраць нас не ўжывалася. Заўсёды выдавалі візу, калі прасілі. У Польшчы ў мяне прыяцелі дактары ёсць.
«НН»: А што Вы можаце сказаць пра дзейнасць СПБ на чале з Анжалікай Борыс?
ІД: Я яе толькі па тэлевізары бачыў. Яна ігнаруе ўсе нашы пасяджэнні. Яе б многія хацелі пабачыць. Перагаварыць на тэмы, якія нас хвалююць, абмеркаваць. Нельга дзяліць палякаў. Мы адна этнічная група, якая павінна развівацца. А цяпер вось ідзе такая напружанасць, якая нагнятаецца звонку. У Борыс ёсць свая пазіцыя, ніхто не можа забараніць ёй яе выкладаць. Але цяпер яна займаецца нейкім раздзёргваннем сітуацыі. Мы хацелі б пачуць яе з першых вуснаў. Мой варыянт вырашэння пытання — круглы стол.
«НН»: А калі вы прыйшлі ў Саюз?
ІД: У 2005 годзе. На тым з’ездзе, дзе абіралі Борыс, мяне не было. Але быў на двух наступных — у Ваўкавыску і Гродна.
Каментары