Паўстанцы ўвайшлі ў Дамаск. Урад заявіў пра гатоўнасць перадаць уладу. Дзе Асад, невядома

Дамаск, імаверна, перайшоў да паўстанцаў. СМІ пішуць, што ў цэнтры Дамаска пачалі збірацца людзі, якія святкуюць звяржэнне рэжыму Башара Асада. Прэм'ер-міністр краіны заявіў, што гатовы прымаць любыя захады па «перадачы» ўлады пасля таго, як паўстанцы ўвайшлі ў сталіцу, піша Руская служба Бі-бі-сі.

Reuters: Асад пакінуў Дамаск

Прэзідэнт Сірыі Башар Асад пакінуў Дамаск у невядомым напрамку, паведаміла Reuters. За ўвесь гэты час ён не зрабіў ніводнай заявы. 

Урадавыя войскі, якія знаходзіліся ў аэрапорце, паводле звестак маніторынгавай групы, былі эвакуіраваны пасля яго вылету.

У самім аэрапорце Дамаска назіраўся хаос. На кадрах відэа бачна, як дзясяткі людзей спрабуюць пакінуць краіну. Там амаль не было персаналу, а на сайтах, якія адсочваюць палёты, не было зафіксавана ніводнага вылету.

Расійскае дзяржагенцтва «РІА Навіны»паведамляе, што ўсе супрацоўнікі пакінулі міжнародны аэрапорт Дамаска, яго праца цалкам спынена.

Сірыйскі Іл-76, які мог везці Башара Асада, знік з радараў пасля рэзкага зніжэння, паведаміў Axios са спасылкай на FlightRadar. 

Магчыма як тое, што самалёт маглі збіць, так і маглі перадатчык адключыць наўмысна, з-за чаго Іл-76 знік з радараў.

Прэм'ер Сірыі заявіў аб гатоўнасці перадаць уладу

Прэм'ер-міністр Сірыі Мухамад Газі аль-Джалалі заявіў, што гатовы супрацоўнічаць з любым кіраўніцтвам, абраным сірыйскім народам, і прымаць любыя меры па «перадачы» ўлады. 

«Гэтая краіна можа быць нармальнай краінай, якая будуе добрыя адносіны са сваімі суседзямі і з усім светам (…), але гэтае пытанне трэба будзе вырашаць любому кіраўніцтву, абранаму сірыйскім народам. Мы гатовы супрацоўнічаць з ім, каб забяспечыць яму ўсе магчымыя ўмовы», — сказаў кіраўнік урада.

Ён заклікаў захаваць «усе інстытуты сірыйскай дзяржавы» і заявіў, што гатовы падтрымаць далейшае кіраванне дзяржаўнымі справамі.

Агенцтва AFP са спасылкай на лідара паўстанцаў перадае, што дзяржаўныя ўстановы ў Дамаску застануцца пад кантролем прэм'ер-міністра да афіцыйнай перадачы ўлады.

Адкрылі турму для палітзняволеных

Сілы паўстанцаў заявілі, што захапілі размешчаную каля Дамаска турму Саедная і вызвалілі зняволеных.

У турму Саедная з самага пачатку грамадзянскай вайны ў Сірыі ў 2011 годзе змяшчалі праціўнікаў рэжыму Башара Асада.

#Syria: the first groups of prisoners is leaving the cells of the Sednaya prison following the collapse of the #Assad regime. pic.twitter.com/JCW2kEksVa

— Thomas van Linge (@ThomasVLinge) December 8, 2024

У 2017 годзе Amnesty International апісвала гэтае месца як «чалавечую бойню». У справаздачы праваабаронцаў сцвярджалася, што за першыя пяць гадоў вайны тут ва ўмовах поўнай сакрэтнасці пакаралі смерцю ад 5 тыс. да 13 тыс. чалавек.

Праваабарончая група таксама заяўляла, што пакаранні, як відаць, былі санкцыянаваныя на самым высокім узроўні, і прыраўноўвала такую ​​практыку да ваенных злачынстваў і злачынстваў супраць чалавечнасці.

Рэжым Асада адхіліў заявы Amnesty International як «беспадстаўныя» і «недакладныя», паводле яго, усе пакаранні ў Сірыі праводзіліся ў адпаведнасці з належнай прававой працэдурай.

• 22
• 0
• 1
• 0
• 3
• 0
• 0
• 0