У Латвіі беларусам хочуць забараніць працаваць у кіраванні крытычнай інфраструктурай
Папраўкі аб новых абмежаваннях супраць грамадзян Расіі і Беларусі падрыхтавала МУС Латвіі.
Папраўкі забараняюць грамадзянам Расіі і Беларусі працаваць у структурах кіравання крытычнай інфраструктурай Латвіі і асабліва значнай у еўрапейскім маштабе крытычнай інфраструктурай.
Крытычнай інфраструктурай лічацца размешчаныя ў Латвіі аб'екты, сістэмы або іх часткі, важныя для рэалізацыі важных грамадскіх функцый, а таксама аховы здароўя, забеспячэння бяспекі, эканамічнага або сацыяльнага дабрабыту людзей, піша Delfi.
«У мэтах умацавання абароны важнай для бяспекі Латвійскай дзяржавы і грамадства крытычнай інфраструктуры папраўкі прадугледжваюць, што ўладальнік крытычнай інфраструктуры, сапраўдны выгаданабытчык або прававы ўладальнік павінен быць лаяльны Латвіі і яе Канстытуцыі, пры гэтым яму забараняецца аказваць падтрымку, у тым ліку інфармацыйную, асобам або дзяржавам, пагражаючым тэрытарыяльнай непадзельнасці, суверэнітэту і незалежнасці або канстытуцыйнаму ладу дэмакратычных дзяржаў», — паведамляе агенцтва LETA.
Папраўкі таксама прадугледжваюць, што Расія або Беларусь, яе грамадзяне або юрыдычныя асобы, зарэгістраваныя ў Расіі або Беларусі, не могуць быць уладальнікам, кіраўнікамі або сапраўдным бенефіцыярам крытычнай інфраструктуры або асабліва значнай у еўрапейскім маштабе інфраструктуры.
Грамадзянам Расіі або Беларусі будзе забаронена займаць пасады ў структурах кіравання крытычнай інфраструктурай і асабліва значнай у еўрапейскім маштабе крытычнай інфраструктурай.
Акрамя таго, грамадзяне Беларусі і Расіі не змогуць уладкоўвацца на працу або аказваць паслугі ў крытычнай інфраструктуры або ў асабліва значнай у еўрапейскім маштабе крытычнай інфраструктуры, калі прадастаўленне паслуг уключае ў сябе доступ да інфармацыі або тэхналагічнага абсталявання, значных для функцыянавання крытычнай інфраструктуры.
Папраўкі прадугледжваюць, што грамадзяне Беларусі або Расіі змогуць выконваць працу ў крытычнай інфраструктуры або еўрапейскай крытычнай інфраструктуры ў парадку выключэння толькі на падставе асобнага дазволу органа дзяржаўнай бяспекі.
Законопраект яшчэ належыць разгледзець ўраду, а затым прыняць парламенту.
Цяпер чытаюць
Што за Дзмітрый Скіндзераў, які абвясціў вайну Ціханоўскай? Супрацоўніцтва з ГУБАЗіКам, даўгі ў Беларусі, даўгі ў Літве23
Каментары