Нарвегія арыштавала судна з расійскім экіпажам у сувязі з пашкоджаннем кабеля ў Балтыйскім моры
Улады расследуюць магчымую датычнасьць судна да пашкоджання аптавалаконнага кабеля ў Балтыйскім моры паміж Латвіяй і Швецыяй, піша Бі-бі-сі.

Арышт быў праведзены на запыт латвійскіх уладаў, паведаміла паліцыя паўночнага нарвежскага горада Тромсё.
Судна Silver Dania, якое належыць нарвежскай кампаніі і ходзіць пад сцягам Нарвегіі, накіроўвалася з Санкт-Пецярбурга ў Мурманск.
Паводле нарвежскага выдання Barents Observer, Silver Dania належыць кампаніі Fjord Shipping, флот якой «цесна супрацоўнічае з расійскімі партнёрамі».
Камунікацыйны кабель з латвійскага горада Вентспілс на шведскі востраў Готланд быў пашкоджаны ў нядзелю.
Адразу пасля інцыдэнту ўлады Швецыі затрымалі сухагруз Vezhen, які зарэгістраваны на Мальце і ўваходзіць у склад флота балгарскай кампаніі Navigation Maritime Bulgare.
Як перадавала агенцтва Reuters са спасылкай на даныя сайта MarineTraffic, гэта судна, разам з некалькімі іншымі, знаходзілася ў раёне, дзе быў пашкоджаны кабель.
За апошні час гэта ўжо чацвёрты выпадак пашкоджання падводных кабеляў у Балтыйскім моры. Прадстаўнікі заходніх краінаў выказваюць падазрэнні, што да інцыдэнтаў можа быць датычная Расія, аднак у Маскве такія здагадкі адпрэчваюць.
Каментары