Пры спрыянні ЗША вызвалілі шматдзетную Алену Маўшук — санітарку бальніцы, якая на пратэстах у Пінску ўдарыла калом па сілавіках
Жанчына правяла за кратамі чатыры з паловай гады. Яе ўтрымлівалі ў калоніі для рэцыдывістак.
Алене Маўшук 48 гадоў, яна шматдзетная маці. У 2020-м жанчына жыла разам з мужам Сяргеем і трыма дзецьмі ў Пінску: на той час адна дачка ў яе была паўналетняя, дзвюм іншым было 10 і 5 гадоў адпаведна. Былі яшчэ двое дзяцей, але Алену пазбавілі бацькоўскіх правоў на іх.
Жанчына працавала санітаркай у пінскай бальніцы і памочніцай кухара ў сталоўцы. Яе дачка Юлія расказвала ў інтэрв'ю, што раней у Алены былі праблемы з алкаголем. Але пазней жанчына ўзялася за розум і паспела аднавіць правы на некаторых з дзяцей.
Найменшая дзяўчынка — сумесная дачка Алены і яе мужа Сяргея.
Алену з Сяргеем затрымалі 10 жніўня 2020-га за ўдзел у начных пратэстах у Пінску. 9 жніўня муж з жонкай выйшлі да гарвыканкама, каб даведацца вынікі галасавання, але замест гэтага аказаліся ў цэнтры сутычкі з узброенымі сілавікамі.
Алена падышла да шарэнгі сілавікоў і ўдарыла па шчытах рукамі, драўляным калом і палкай.
Падчас затрымання Алену і Сяргея збівалі, былі звесткі, што ў жанчыны з'явіліся праблемы са слыхам. Пазней яго адпусцілі пад хатні арышт, а яе пакінулі за кратамі да суда. Неўзабаве з Сяргеем звязалася былая сукамерніца яго жонкі, якая расказала, што Алена сядзіць за кратамі «голая, босая, збітая».
30 красавіка 2021-га ў Брэсце вынеслі прысуд Маўшукам і яшчэ 12 фігурантам «пінскай справы»: Алену прысудзілі да 6 гадоў за кратамі, Сяргея — да 6,5 гадоў. Пакуль жанчына была ў СІЗА, яе 10-гадовую дачку забралі ў сацыяльны прытулак (пазней атрымалася забраць дзіця адтуль). Пасля абвяшчэння прысуду Алена напісала ў сшытку «Я павешуся» і паказала зале.
Падчас зняволення Алену пазбавілі бацькоўскіх правоў. Да яе прымянялі фізічны і псіхалагічны гвалт, пазбаўлялі перадач і спатканняў з блізкімі. Паколькі ў жанчыны была судзімасць, яна адбывала тэрмін у калоніі №24 — той самай калоніі, якую Паліна Шарэнда-Панасюк нядаўна назвала «жывадзёрняй».
Цяпер Алена Маўшук на волі. Яе муж застаецца за кратамі.
«Наша Нiва» — бастыён беларушчыны
ПАДТРЫМАЦЬ
Каментары
А ты, сорам, не саромся ісці у гэты полк. Толькі ты ня пойдзеш, бо табе толькі іншых аб-ць бы.