«Дайце 18 рублёў на праезд». Дзяўчына сабрала з дапамогай старога трука прыстойную суму
Гісторыя з чарговым «разводам» на грошы атрымала нечаканы паварот. У мінскую міліцыю звярнуўся мужчына, які спачатку даў незнаёмай дзяўчыне 18 рублёў на праезд, а праз некалькі дзён пералічыў ёй яшчэ 450 рублёў, піша Onliner.by.
Як распавёў пацярпелы, на вакзале да яго падышла дзяўчына і папрасіла грошы на квіток, паабяцаўшы вярнуць пазней. Яна нават пакінула свой нумар тэлефона для сувязі.
Праз некалькі дзён дзяўчына напісала ў месенджары і паведаміла, што ёй тэрмінова патрэбныя грошы на пахаванне маці. Мужчына, паверыўшы, пералічыў ёй 450 рублёў. Але абяцання вярнуць доўг яна не выканала.
Міліцыя ўстанавіла асобу дзяўчыны: ёй 26 гадоў, яна жыве ў Мінску. Грошы, атрыманыя пад выглядам дапамогі, яна патраціла на асабістыя патрэбы і стаўкі ў анлайн-казіно.
Па факце махлярства заведзена крымінальная справа.
Падобныя выпадкі здараюцца нярэдка. Карыстальнікі распавядаюць, што часта сутыкаюцца з людзьмі, якія просяць грошы «на праезд», пакідаюць кантактныя даныя, але потым знікаюць.
— У мяне была такая сітуацыя на скрыжаванні Ракасоўскага і Пляханава, — піша чытач. — Дзяўчына папрасіла 17 рублёў на маршрутку Мінск — Клецк, казала, што верне праз пару гадзін. Я ведаў пра такія схемы, але падумаў: а можа, сапраўды патрэбна дапамога?
Паводле яго слоў, дзяўчына настаяла на абмене нумарамі, нават паказала разліковы ліст з працы ў краме на Ракасоўскага і пашпарт, дзе супадалі прозвішча і ініцыялы.
Такія выпадкі — напамін пра тое, што нават маленькая сума можа стаць інструментам махляроў.
Цяпер чытаюць
Прапагандысты запэўніваюць, што 196 палітвязняў ужо на свабодзе4
Каментары