Прапагандысты паказалі шэсць беларусаў, арыштаваных за данаты. Большасць з іх пераводзілі нязначныя сумы
На кіраўніка адной з найбуйнейшых кампаній па перавозках завялі новую крымінальную справу.
Ягор Волкаў
Ягор Волкаў — 55-гадовы бізнэсовец з Мінска. Ён кіруе буйной кампаніяй, якая займаецца грузаперавозкамі. На АНТ яе называюць самай буйной у краіне.
Праваабаронцам было вядома, што яго асудзілі на тры гады за фота з пратэстаў і невялікі данат. Таксама вядома, што яго змусілі перавесці грошы на рахункі дзяржаўных медыцынскіх установаў.
З фільма АНТ вынікае, што супраць Волкава завялі новую справу. Цяпер яго вінавацяць у данатах памерам 11 тысяч даляраў у крыптавалюце на рахункі Палка Каліноўскага, а таксама ў тым, што ён нібыта абыходзіў падаткі. Артыкулы, па якіх яго абвінавачваюць, невядомыя.
Васіль Арэшка
Васіль Арэшка, пра якога мы пісалі раней, перавёў зусім невялікую суму Палку Каліноўскаму і некаторым іншым арганізацыям, якія не называюцца. Мяркуючы па скрыншотах з фільма, рабіў ён гэта ў тым ліку праз Patreon. Мы пісалі грунтоўны артыкул пра тое, як абараніць свой акаўнт там — прачытаць яго можна тут.
Аляксей Пераверзеў
Аляксею Пераверзеву 26 гадоў. Ён мінчук. Па звестках з відэа АНТ, нядаўна адслужыў у арміі.
Пераверзева вінавацяць у тым, што ён перавёў 50 даляраў на Полк Каліноўскага. У відэа ён кажа, што падтрымаў нейкі гуманітарны збор.
Ігар Гальцоў
40-гадовы праграміст з Магілёва. У 2013-м годзе скончыў Беларуска-расійскі ўніверсітэт, адвучыўся на інжынера. Спецыялізуецца на працы з платформай Magento, якая выкарыстоўваецца для стварэння інтэрнэт-крам і арганізацыі анлайн-гандлю. У яго ёсць маленькая дачка і жонка.
Ігар Гальцоў перавёў на ютуб-канал «Люстэрка» каля 50 даляраў праз «Патрэон». Адбылося гэта ў 2023 годзе.
Дзмітрый Хамянкоў
Дзмітрый Хамянкоў — 39-гадовы гамяльчук. Ён праграміст. Месцам апошняй працы Хамянкова ў Linkedin пазначаная Expert Software Development. Ён не захацеў рэлакавацца ў 2022 годзе.
Па звестках з фільма АНТ, Хамянкова абвінавачваюць у «фінансаванні экстрэмісцкай дзейнасці». Ён рабіў пераводы ў крыптавалюце. Паведамляецца, што яго затрымалі напрыканцы 2024 года, пакуль хлопец за кратамі, у яго памерла бабуля.
Наталля Левая
У фільме распавялі новыя падрабязнасці справы Наталлі Левай. Яе выклікалі ў КДБ за чатыры данаты. Але выявілася, што яна рабіла яшчэ 13 данатаў на агульную суму 3800 рублёў «на рахункі экстрэмісцкіх і тэрарыстычных арганізацыяў».
Наталля выдаліла свой кашалёк. Але, відаць, не зусім — сілавікі кажуць, што яна «зашыфравала файл з паролем ад кашалька з дапамогай фаташопа». А супрацоўнікі КДК быццам бы адшукалі крыптакашалёк і атрымалі да яго доступ. Але выглядае так, што сілавікі загадзя ведалі пра тое, што кашалёк належыць ёй.
У артыкуле пра крыптавалюты мы раілі выдаляць кашалькі бясследна (са стратай доступу) і чысціць сляды выкарыстання біржаў, а таксама не свяціць вашы кашалькі публічна. Гэта адзінае, што можа выратаваць ад узнаўлення кашалька — калі вы не маеце да яго доступ, то ніхто не мае.
«Наша Нiва» — бастыён беларушчыны
ПАДТРЫМАЦЬСуўладальніка «Варгеймінга» Мікалая Кацалапава абвінавачваюць у данатах апазіцыйным структурам на сотні тысяч даляраў
На тэлебачанні паказалі новага абвінавачанага за «фінансаванне экстрэмізму» — ён працаваў у Польшчы, але ездзіў у Беларусь
Каго садзяць за данаты, а каму дазваляюць адкупіцца. Вось якая логіка
Каментары