У нядзелю стала вядома аб прызначэнні брата прэзідэнта Сірыі Ахмада аль-Шараа генсакратаром прэзідэнцкай адміністрацыі. Махер аль-Шараа шмат гадоў жыў у Варонежы і працаваў у паліклініцы Расійскай чыгункі. Яго жонка і маці трох яго дзяцей — грамадзянка Расіі, а яе сястра валодае фірмай, якая атрымлівае дзяржпадрады ў Варонежы, піша «Агентство».
Як паведамляе выданне Syria.tv, генсакратар Адміністрацыі прэзідэнта Сірыі — высокая пасада. Кіраўнік адміністрацыі адказвае за ўзаемадзеянне з дзяржустановамі, кантралюе парадак дня прэзідэнта, арганізуе яго афіцыйныя сустрэчы, сочыць за выкананнем указаў і каардынуе афіцыйную перапіску.
У 2022-2023 гадах Махер Аль-Шараа працаваў кансультантам па пытаннях аховы здароўя ў бальніцах на поўначы Сірыі, а потым заняў пасаду міністра аховы здароўя, вынікае з публікацыі Syria.tv.
Да пераезду ж у Сірыю Махер аль-Шараа доўгі час жыў і працаваў у Расіі, паведамілі ў панядзелак адразу некалькі пракрамлёўскіх СМІ.
Яны знайшлі профіль гінеколага Махера Хусэйна Альшараа на сайце «Пра дактароў».
Паводле дадзеных сайта, у 2000-м новы кіраўнік прэзідэнцкай адміністрацыі Сірыі скончыў Варонежскую дзяржаўную медакадэмію ім. М. Бурдэнкі, дзе потым неаднаразова праходзіў павышэнне кваліфікацыі. З 2004 па 2013 гады працаваў у Сірыі, а затым вярнуўся ў Варонеж, дзе прапрацаваў аж да 2024 года. Апошнім месцам працы Сірыйца стала паліклініка РЖД, дзе ён кіраваў жаночай кансультацыяй.
Працы на Расійскай чыгунцы Махеру аль-Шаара не перашкодзіў нават той факт, што ў пачатку 2010-х яго брат узначальваў «Джэбхат ан-Нусру», сірыйскі філіял «Аль-Каіды». Падтрымку «Джэбхат ан-Нусрэ» аказвала і «Ісламская дзяржава». Пазней «Джэбхат ан-Нусра» разарвала сувязі з ІДІЛ і была ператворана ў «Хайят Тахрыр аш-Шам» (ХТШ), якая ў пачатку 2020-х была прызнаная тэрарыстычнай у Расіі. ХТШ апынулася адной з галоўных сіл, якія разбурылі рэжым Асада, а лідар арганізацыі пасля гэтага стаў новым кіраўніком Сірыі.
Паводле звестак памежнай службы, з якімі азнаёмілася «Агентство», новы кіраўнік Адміністрацыі прэзідэнта Сірыі паляцеў з Расіі ў турэцкі горад Ізмір у ліпені 2022 года. Пасля гэтага, паводле ўцечкі, ён не вяртаўся.
Жонка чыноўніка — грамадзянка Расіі Таццяна Закірава (мае таксама сірыйскае грамадзянства), высветліла выданне з уцечак.
У пары — трое дзяцей. Старэйшаму сыну Рашыду аль-Шараа ўжо споўнілася 23 гады, у 2020-м ён паступіў у Варонежскі дзяржуніверсітэт. Дачцэ Марыі — 20 гадоў, малодшаму сыну Камілю — 13 гадоў.
Закірава аж да 2020 года займалася бізнесам, у 2000-х яна валодала доляй у кампаніі «Пантэра» (тэхагляд), пасля гэтага — у фірме «Разумны сад» (ландшафтны дызайн). Яе партнёрам па апошнім бізнесе была родная сястра Яўгенія Жарабцова. Жарабцова таксама валодае і кіруе больш буйной фірмай «Нясумны сад», даходы якой перавышаюць 50 млн рублёў у год. Фірма сястры Закіравай штогод з 2013 года атрымлівае дзяржкантракты ад адміністрацыі Варонежа на добраўпарадкаванне тэрыторый, за апошнія тры гады сума падрадаў перавысіла 45 млн рублёў.
Сувязі сваякоў прэзідэнта з Расіяй могуць аказаць уплыў на адносіны новых уладаў Сірыі з Расіяй, робіць выснову «Агентство». У лютым міністр абароны Сірыі Мурхаф Абу Касра дапусціў у інтэрв'ю The Washington Post, што ўлады Сірыі могуць захаваць расійскія базы ў краіне.
Каментары
вось і хадзі потым да такіх ізурачэй