Жан-Клод Ван Дам перадаў «пацалунак Пуціну» на фоне абвінавачванняў у сэксуальных злачынствах
64-гадовы акцёр Жан-Клод Ван Дам звярнуўся да Уладзіміра Пуціна і заявіў пра гатоўнасць прыехаць у Расію і стаць «паслом міру». Таксама ён перадаў пацалунак расейскаму прэзідэнту і ягонай сям'і. Відэа з ягоным зваротам апублікаваў тэлеграм-канал «Панченко», і на ім акцёр знаходзіцца побач з былым дэпутатам украінскай Партыі рэгіёнаў Віктара Януковіча Аляксандрам Анішчанкам, піша The Moscow Times.
«Для мяне гэта будзе гонарам», — заявіў акцёр, нагадаўшы пра сустрэчу з Пуціным на чэмпіянаце Еўропы ў баях без правіл у Сочы.
Відэа не было размешчана ў афіцыйным акаўнце акцёра, але ў ягоным інстаграме з'явілася відэа з яшчэ адным прыхільнікам Уладзіміра Пуціна Стывенам Сігалам, якога Ван Дам называе сваім блізкім сябрам. У 2024 годзе Сігал заявіў, што гатовы «памерці за Пуціна», і наведаў ягоную інаўгурацыю.
У пачатку вайны Жан-Клод Ван Дам падтрымліваў Украіну. Акцёр у 2022 годзе пабываў з візітам у Закарпацці і фатаграфаваўся з украінскімі памежнікамі. Ён пазіраваў на фота ў вышыванцы і выкрыкваў лозунг «Слава Украіне!».
Летась акцёр апынуўся ў цэнтры скандалу. У красавіку 2024 года румынскае выданне Libertatea паведаміла, што Ван Дам стаў фігурантам справы аб гандлі людзьмі, уключаючы непаўналетніх. Расследаванне вядзе румынская пракуратура па барацьбе з арганізаванай злачыннасцю. Следства мяркуе, што ён уцягваў дзяўчат у сэксуальную эксплуатацыю з выкарыстаннем псіхалагічнага ціску.
Жан-Клод Ван Дам — не першы акцёр, які абвінавачваецца ў злачынствах і падтрымліваў сувязь з Расіяй. У 2018 годзе супраць Стывена Сігала было пачата расследаванне за згвалтаванне ў 2002 годзе. Але справа праз некалькі месяцаў пасля пачатку была закрытая пракуратурай Лос-Анджэлеса з-за заканчэння тэрміну даўніны. У 2016 годзе Сігал атрымаў расійскае грамадзянства, а ў 2018-м прызначаны спецпрадстаўніком МЗС РФ па гуманітарных сувязях з ЗША.
Яшчэ адзін удзельнік скандалаў — французскі акцёр Жэрар Дэпард'ё. Ён абвінавачваецца ў сэксуальных дамаганнях і згвалтаваннях — больш за дзясятак жанчын выставілі адпаведныя абвінавачванні. У 2025 годзе праходзіў судовы працэс па справе аб гвалце на здымачнай пляцоўцы ў 2021 годзе.
У 2013 годзе Дэпард'ё атрымаў расійскае грамадзянства пасля канфлікту з французскімі падатковымі ўладамі. Пасля пачатку вайны француз перастаў прыязджаць у Расію і здымацца ў ёй, а ў Дзярждуме ў пачатку 2025 года заклікалі адабраць у яго пашпарт.
Ван Дама абвінавачваюць па справе аб сэкс-гандлі непаўналетнімі
«Я схапіў яе за сцёгны, каб не паслізнуцца». У Парыжы ідзе судовы працэс над Жэрарам Дэпард'ё па абвінавачванні ў сэксуальным гвалце
Як Пракоп'ева фатаграфавалі з голай жанчынай, а Сігал прыехаў на здымку з зялёным кавуном ад Лукашэнкі
Беларусы, якія сталі зоркамі ў Расіі: што з імі стала за час поўнамаштабнай вайны?
Цяпер чытаюць
Лукашэнка нервова пракаментаваў візіт Ціханоўскай у Кіеў20
Каментары